Belgiya hukumati 2025/2026-o‘quv yilidan boshlab maktablarda mobil telefon va boshqa elektron qurilmalardan foydalanishni taqiqlaydi. Bu haqda Anadolu xabar berdi.

Taqiq mamlakatning barcha hududlarda — fransuz, flamand va nemis tilli qo‘llaniladigan mintaqalarda amal qiladi.
“Faqat ta’limiy maqsadlarda, sog‘liqdagi muammolar yoki favqulodda vaziyatlar taqozo qilganda telefon ishlatishga ruxsat beriladi”, deb yozgan mahalliy nashrlardan biri.
Hozirga qadar mintaqalarda turlicha qoidalar amal qilib kelgan. Masalan, fransuz tilida so‘zlashuvchi hududlarda (Valoniya va Bryussel) boshlang‘ich maktablarda telefonlar 2024-o‘quv yilidan beri butunlay taqiqlangan. O‘rta maktablarda ham qat’iy cheklovlar joriy etilgan.
Yangi qoidalarga ko‘ra, 2025–2026 yildan boshlab telefon va boshqa gadjetlardan dam olish uchun foydalanish maktabgacha, boshlang‘ich hamda o‘rta ta’lim bosqichlarida taqiqlanadi. Nemis tilida so‘zlashuvchi hududlarda taqiq nafaqat darslarda, balki tanaffuslarda ham amal qiladi.
Flamand maktablarida esa telefonlar allaqachon maktabgacha va boshlang‘ich sinflarda cheklangan edi. Endi bu qoida bosqichma-bosqich o‘rta maktablarga ham tatbiq etiladi: birinchi va ikkinchi sinflarda telefon va aqlli soatlardan foydalanish butunlay man etiladi, uchinchi sinfda esa faqat dars paytida taqiq joriy qilinadi. Ma’lumot o‘rnida, Belgiyada o‘quv yili fransuz tilida o‘qitiladigan maktablarda 25-avgustda, qolgan hududlarda esa 1-sentyabrda boshlanadi.
Izoh (0)