Бельгия ҳукумати 2025/2026-ўқув йилидан бошлаб мактабларда мобил телефон ва бошқа электрон қурилмалардан фойдаланишни тақиқлайди. Бу ҳақда Anadolu хабар берди.
Тақиқ мамлакатнинг барча ҳудудларда — француз, фламанд ва немис тилли қўлланиладиган минтақаларда амал қилади.
“Фақат таълимий мақсадларда, соғлиқдаги муаммолар ёки фавқулодда вазиятлар тақозо қилганда телефон ишлатишга рухсат берилади”, деб ёзган маҳаллий нашрлардан бири.
Ҳозирга қадар минтақаларда турлича қоидалар амал қилиб келган. Масалан, француз тилида сўзлашувчи ҳудудларда (Валония ва Брюссел) бошланғич мактабларда телефонлар 2024-ўқув йилидан бери бутунлай тақиқланган. Ўрта мактабларда ҳам қатъий чекловлар жорий этилган.
Янги қоидаларга кўра, 2025–2026 йилдан бошлаб телефон ва бошқа гаджетлардан дам олиш учун фойдаланиш мактабгача, бошланғич ҳамда ўрта таълим босқичларида тақиқланади. Немис тилида сўзлашувчи ҳудудларда тақиқ нафақат дарсларда, балки танаффусларда ҳам амал қилади.
Фламанд мактабларида эса телефонлар аллақачон мактабгача ва бошланғич синфларда чекланган эди. Энди бу қоида босқичма-босқич ўрта мактабларга ҳам татбиқ этилади: биринчи ва иккинчи синфларда телефон ва ақлли соатлардан фойдаланиш бутунлай ман этилади, учинчи синфда эса фақат дарс пайтида тақиқ жорий қилинади. Маълумот ўрнида, Бельгияда ўқув йили француз тилида ўқитиладиган мактабларда 25 августда, қолган ҳудудларда эса 1 сентябрда бошланади.
Изоҳ (0)