Janubiy Koreya prezidenti Li Je Myong 18-avgust kuni hukumat yig‘ilishida vazirliklarga Shimoliy Koreya bilan mavjud kelishuvlarni bosqichma-bosqich tiklashga buyruq berdi. Bu haqda mahalliy nashrlarga tayanib, Al Arabiya xabar berdi.
Prezident aniq qaysi kelishuvlar nazarda tutilayotganini ochiqlamagan. Biroq u 15-avgust kuni Seul 2018-yilda imzolagan, ammo keyinchalik bekor qilingan chegara hududidagi harbiy faoliyatni qisqartirishga doir bitimni qayta tiklash niyatida ekanini bildirgandi.
“Janubiy va Shimoliy Koreya o‘rtasidagi munosabatlar bizning milliy manfaatlarimizni himoya qilish hamda tez o‘zgarayotgan tashqi sharoitlarda diplomatik imkoniyatlarimizni kengaytirishda hal qiluvchi ahamiyatga ega”, dedi Li kabinet yig‘ilishida.
U vazirliklardan ikki davlat o‘rtasidagi mavjud bitimlarini imkoni boricha to‘xtatgan joyidan bosqichma-bosqich amalga oshirishni so‘ramoqda.
Ma’lumot uchun, Janubiy Koreya sobiq prezidenti Mun Je In va Shimoliy Koreya yetakchisi Kim Chen In 2018-yilda ikki mamlakat chegarasida ziddiyatlarni yumshatishga qaratilgan kelishuv imzolangan edi. Biroq keyingi yillarda Pxenyan tomonidan yadro va raketa sinovlarining davom ettirilishi hamda xalqaro sanksiyalar sabab bu bitim amalda buzilgan. Janubiy va Shimoliy Koreya Ikkinchi jahon urushidan keyin bo‘linib ketgan bo‘lsa-da, ular rasmiy ravishda hanuz urush holatida — 1950–1953-yillardagi Koreya urushi sulh bitimi bilan tugagan, ammo tinchlik shartnomasi imzolanishi amalga oshmagan.
Li Je Myong iyun oyida prezidentlik lavozimini egallagach, Pxenyan bilan muzokaralarni qayta tiklashga intilib kelmoqda. Ammo Shimoliy Koreya rasmiylari janub prezidentining tashabbuslarini hozircha rad etib keladi. Janibiy Koreyaning amaldagi hukumati bugunga qadar KXDR bilan bevosita muloqot o‘tkazmagan. Tahlilchilarning fikricha, Li Je Myongning tashabbuslari Shimolni keskinlikni kamaytirishga undashi mumkin, ammo Pxenyan yadroviy dasturidan voz kechmagan bir paytda jarayon murakkab bo‘lib qolmoqda.
Izoh (0)