AQSH narkokartellarga qarshi kurash doirasida Karib dengizi janubiga havo va dengiz kuchlarini yubordi. Bu haqda uchta manbaga tayanib, Reuters xabar berdi.
Missiyaga 4 mingdan ortiq dengiz piyodalari, flot xizmatchilari, yadro suvosti kemasi, bir nechta esminetslar, raketa kreyseri, shuningdek, qo‘shimcha P8 Poseidon razvedka samolyotlari jalb qilinadi. Harbiylar va texnika “Ivodzima” (USS Iwo Jima) amfibiya guruhining desant kemalari tashiydi. Missiyada dengiz piyodalarining 22-ekspeditsiya guruhi ishtirok etmoqda. Ular AQSH Janubiy qo‘mondonligi (SouthCom) mas’ul hududda joylashishi kutilmoqda.
Manbalardan birining aytishicha, mazkur operatsiya namoyishkorona xususiyatga ega. U AQSHning narkoterror tashkilotlarga qarshi qat’iy harakatlarga tayyorligini ko‘rsatishga qaratilgan.
Yana bir amaldor esa qo‘shimcha kuchlar kartellardan kelib chiqayotgan milliy xavfsizlik tahdidlarini bartaraf etishga yo‘naltirilganini aytdi. Zarurat tug‘ilganda AQSH prezidenti Donald Tramp ushbu resurslardan to‘g‘ridan to‘g‘ri harbiy choralar uchun foydalanishi mumkin. Mavjud zarba beruvchi vositalarning ko‘pligi unga va qo‘mondonlikka turli ssenariylarni tanlash imkonini beradi.
Shu bilan birga, Pentagon dengiz piyodalari narkotik moddalar savdosiga chek qo‘yish bo‘yicha operatsiyalarni o‘tkazishga o‘rgatilmaganidan tashvishda. Bu esa ularning ko‘p jihatdan qirg‘oq qo‘riqchilariga tayanishiga olib keladi.
AQSH harbiy-dengiz kuchlari 15-avgust kuni USS Iwo Jima, USS Fort Lauderdale va USS San Antonio desant kemalaridan iborat amfibiya guruhini jo‘natganini e’lon qildi, biroq manzilni aniq ko‘rsatmadi. Yil boshida mudofaa vaziri Pit Hegset imzolagan memorandumda AQSH qurolli kuchlarining ustuvor vazifasi mamlakatni himoya qilish ekani, bunga noqonuniy migratsiya va narkotrafikka qarshi kurash ham kirishi alohida ta’kidlangan.
Mart oyida esa AQSh harbiylari Meksika yaqiniga esminetslarni joylashtirgan, bu esa Shimoliy qo‘mondonlik missiyasini qo‘llab-quvvatlash, ya’ni chegaralar xavfsizligini ta’minlash va AQShning G‘arbiy yarimshardagi ishtirokini kuchaytirish maqsadida amalga oshirilgan edi.
Izoh (0)