Shveysariyaning Lozanna shahrida haydovchi belgilangan tezlikdan 27 kilometr soat tezroq harakatlangani uchun 90 ming Shveysariya franki miqdorida (taxminan 110 ming dollar) jarimaga tortildi. Bu haqda Associated Press xabar berdi.
Bildirilishicha, ushbu summa haydovchiga uncha qiyinchilik tug‘dirmaydi — u mamlakatning eng boy odamlardan biri sanaladi. Hozirgi tartibga ko‘ra, mamlakatda daromadi past odamlar jarima o‘rniga bir kecha hibsda qolishi mumkin, eng boy qatlam esa o‘n minglab frank to‘lashga majbur bo‘ladi. Boshqacha aytganda, jarima miqdori haydovchining daromadi, mol-mulki va oilaviy moliyaviy ahvolidan kelib chiqib belgilanadi. Bunday tizim Germaniya, Fransiya, Avstriya va ayrim Skandinaviya davlatlarida ham amal qiladi.
Shveysariya sudi qoidabuzarga dastlab 10 ming frank (12,3 ming dollar) jarimani, qolgan 80 mingini esa keyingi 3 yil ichida shunga o‘xshash qoidabuzarlik sodir etgan taqdirda to‘lashini belgilagan. Mahalliy nashrlar xabariga ko‘ra, fransuz fuqarosi bo‘lgan bu haydovchi Shveysariyaning eng boy 300 nafar kishisi ro‘yxatida bo‘lib, boyligi yuz millionlab dollarga teng. Radar uni 50 kilometr/soat tezlik ruxsat etilgan ko‘chada 77 kilometr/soat tezlikda haydab ketayotganda suratga olgan. U bundan 8 yil oldin ham tezlikni oshirgani uchun 10 ming frank jarima to‘lagan va agar 2 yil ichida yana shunday holat takrorlansa, qo‘shimcha 60 ming frank to‘lash sharti qo‘yilgandi.
Shveysariyada hatto politsiyachilar ham bunday jazolardan chetda qolmaydi — 2016-yilda Jenevada bir ofitser bankomatni portlatgan talonchilarni quvib ketayotib, tezlik me’yorini ikki barobar oshirgani uchun jarimaga tortilgan.
Yuqoridagi 110 ming dollarlik jarima Shveysariya tarixidagi eng katta miqdor emas. 2010-yilda millioner Ferrari haydovchisi tezlik oshirgani uchun 290 ming dollarlik jarimaga tortilgandi. Bunday qat’iy choralar 2007-yilda shveysariyalik saylovchilar jarimalarni haydovchining daromadi va boyligiga qarab belgilashga ruxsat berganidan keyin joriy etilgan.
Izoh (0)