Isroil bosh vaziri Binyamin Netanyaxu Eron aholisiga murojaat qilib, ularni mamlakat rahbariyatiga qarshi qo‘zg‘olon ko‘tarishga chaqirdi. Bu haqda The Jerusalem Post xabar berdi.
Netanyaxu o‘z murojaatida Erondagi o‘tkir suv tanqisligi muammosini “hozirgi tuzum ag‘darilishi” bilanoq hal etishga va’da berdi. U Eron prezidenti Mas’ud Pezeshkiyonning yaqinda bergan bayonotidan iqtibos keltirdi. Unda siyosatchi jiddiy milliy muammolar, jumladan suv tanqisligi mavjudligini aytgandi.
Yozning jazirama issig‘ida bolalaringiz chanqog‘ini qondirish uchun toza sovuq suvingiz ham yo‘q. Bu qanday munofiqlik. Eron xalqiga nisbatan qanday e’tiborsizlik, dedi Netanyaxu.
U qariyb o‘n yil oldin suv resurslarini boshqarishni o‘rgatish uchun fors tilida Telegram kanalini ishga tushirgani va u tez orada 100 000 obunachiga ega bo‘lganini esladi.
Erondagi suvga tashnalik faqat ozodlikka bo‘lgan chanqoq bilan taqqoslanadi, dedi Isroil bosh vaziri.
Netanyaxu “Eron ozod bo‘lishi bilanoq, Isroilning suv resurslari bo‘yicha yetakchi mutaxassislari ilg‘or texnologiyalar va tajribalarini olib, Eronning har bir shahriga oqib kelishini” va’da qildi. U Eron rahbariyatini o‘z fuqarolariga “zulm va qashshoqlikni” singdirish hamda ichki ehtiyojlarni moliyalashtirish o‘rniga HAMAS, “Hizbulloh” va husiylarga yuzlab milliard dollarni yo‘naltirishda aybladi.
Siz og‘ir urush paytida yolg‘iz azob chekayotganingizda, mamlakatdan qochib ketadigan rahbarlarga munosib emassiz, deya gijgijladi yahudiy vaziri.
Nutqining yakunida Netanyaxu eronliklarni ko‘chalarga chiqishga, “zulmga qarshi” kurashishga va Eronning “korrupsiyaga botgan” rahbariyatini javobgarlikka tortishga chaqirdi.
Bu mutaassib mullalarga hayotingizni bir daqiqa ham izdan chiqarishga yo‘l qo‘ymang. Siz yolg‘iz emassiz. Isroil siz bilan. Butun ozod dunyo siz bilan, deb ta’kidladi u.
Eronda suv tanqisligi
Iyul oyi oxirida Eron misli ko‘rilmagan suv inqiroziga duch keldi, poytaxt Tehron bir necha haftadan keyin suv ta’minotidan uzilishi mumkin. G‘arb ommaviy axborot vositalariga ko‘ra, inqirozga bir qator omillar, jumladan, o‘nlab yillar davomida suv resurslarini samarasiz boshqarish, talab va taklif o‘rtasidagi nomutanosiblik kuchayishi sabab bo‘lgan.
Bundan tashqari, anomal issiqlik oqibatida Eronning bir nechta chuqur suv omborlari sayozlashdi. Iyul oyida Tehron viloyatida suv va elektr energiyasini tejash zarurati tufayli qo‘shimcha dam olish kuni belgilandi.
Isroil va Eron o‘rtasidagi so‘nggi keskinlik
Ma’lumot o‘rnida, iyun oyi oxirida Isroil va Eron bir-birining shaharlari va yadroviy obyektlariga hujum qilib, ketma-ket raketa zarbalarini almashgan edi. Keyinroq mojaroga AQSH ham qo‘shildi va Erondagi uchta yadroviy obyekt — Fordo, Natanz va Isfahonga zarbalar berdi.
O‘shanda Eron Tashqi ishlar vazirligi AQSHning hujumi uzoq muddatli oqibatlarga olib kelishini aytgandi. Shuningdek, Eron AQSH zarbalariga qaramay, yadro energetikasini rivojlantirishni to‘xtatmasligini bildirdi. Oradan bir necha kun o‘tib, AQSH prezidenti Tramp Eron va Isroil o‘rtasida sulh tuzilganini e’lon qildi. Sulhga qaramay, keyinroq Tramp Eronning yadroviy obyektlariga yana zarba berishga tayyorligini aytdi.
Izoh (0)