Исроил бош вазири Биньямин Нетаньяху Эрон аҳолисига мурожаат қилиб, уларни мамлакат раҳбариятига қарши қўзғолон кўтаришга чақирди. Бу ҳақда The Jerusalem Post хабар берди.
Нетаньяху ўз мурожаатида Эрондаги ўткир сув танқислиги муаммосини “ҳозирги тузум ағдарилиши” биланоқ ҳал этишга ваъда берди. У Эрон президенти Масъуд Пезешкиённинг яқинда берган баёнотидан иқтибос келтирди. Унда сиёсатчи жиддий миллий муаммолар, жумладан сув танқислиги мавжудлигини айтганди.
Ёзнинг жазирама иссиғида болаларингиз чанқоғини қондириш учун тоза совуқ сувингиз ҳам йўқ. Бу қандай мунофиқлик. Эрон халқига нисбатан қандай эътиборсизлик, деди Нетаньяху.
У қарийб ўн йил олдин сув ресурсларини бошқаришни ўргатиш учун форс тилида Telegram каналини ишга туширгани ва у тез орада 100 000 обуначига эга бўлганини эслади.
Эрондаги сувга ташналик фақат озодликка бўлган чанқоқ билан таққосланади, деди Исроил бош вазири.
Нетаньяху “Эрон озод бўлиши биланоқ, Исроилнинг сув ресурслари бўйича етакчи мутахассислари илғор технологиялар ва тажрибаларини олиб, Эроннинг ҳар бир шаҳрига оқиб келишини” ваъда қилди. У Эрон раҳбариятини ўз фуқароларига “зулм ва қашшоқликни” сингдириш ҳамда ички эҳтиёжларни молиялаштириш ўрнига ҲАМАС, “Ҳизбуллоҳ” ва ҳусийларга юзлаб миллиард долларни йўналтиришда айблади.
Сиз оғир уруш пайтида ёлғиз азоб чекаётганингизда, мамлакатдан қочиб кетадиган раҳбарларга муносиб эмассиз, дея гижгижлади яҳудий вазири.
Нутқининг якунида Нетаньяху эронликларни кўчаларга чиқишга, “зулмга қарши” курашишга ва Эроннинг “коррупцияга ботган” раҳбариятини жавобгарликка тортишга чақирди.
Бу мутаассиб муллаларга ҳаётингизни бир дақиқа ҳам издан чиқаришга йўл қўйманг. Сиз ёлғиз эмассиз. Исроил сиз билан. Бутун озод дунё сиз билан, деб таъкидлади у.
Эронда сув танқислиги
Июль ойи охирида Эрон мисли кўрилмаган сув инқирозига дуч келди, пойтахт Теҳрон бир неча ҳафтадан кейин сув таъминотидан узилиши мумкин. Ғарб оммавий ахборот воситаларига кўра, инқирозга бир қатор омиллар, жумладан, ўнлаб йиллар давомида сув ресурсларини самарасиз бошқариш, талаб ва таклиф ўртасидаги номутаносиблик кучайиши сабаб бўлган.
Бундан ташқари, аномал иссиқлик оқибатида Эроннинг бир нечта чуқур сув омборлари саёзлашди. Июль ойида Теҳрон вилоятида сув ва электр энергиясини тежаш зарурати туфайли қўшимча дам олиш куни белгиланди.
Исроил ва Эрон ўртасидаги сўнгги кескинлик
Маълумот ўрнида, июнь ойи охирида Исроил ва Эрон бир-бирининг шаҳарлари ва ядровий объектларига ҳужум қилиб, кетма-кет ракета зарбаларини алмашган эди. Кейинроқ можарога АҚШ ҳам қўшилди ва Эрондаги учта ядровий объект — Фордо, Натанз ва Исфаҳонга зарбалар берди.
Ўшанда Эрон Ташқи ишлар вазирлиги АҚШнинг ҳужуми узоқ муддатли оқибатларга олиб келишини айтганди. Шунингдек, Эрон АҚШ зарбаларига қарамай, ядро энергетикасини ривожлантиришни тўхтатмаслигини билдирди. Орадан бир неча кун ўтиб, АҚШ президенти Трамп Эрон ва Исроил ўртасида сулҳ тузилганини эълон қилди. Сулҳга қарамай, кейинроқ Трамп Эроннинг ядровий объектларига яна зарба беришга тайёрлигини айтди.
Изоҳ (0)