AQShning sobiq prezidenti Grover Klivlendga tegishli Nyu Jersining janubida joylashgan Prinston shahridagi uy 5,28 million dollarga sotildi, deb xabar bermoqda Mansion Global.
Uyning umumiy maydoni 589,4 kvadrat metr bo‘lib, unda yettita hammom va oltita yotoqxona mavjud. Barcha xonalardagi shift balandligi 3,6 metr. Uyning ichki qismida Klivlend davriga oid original dekorativ elementlar — ganch o‘ymakorligi, yog‘och bezaklar va marmar qoplamalar hanuz saqlanib qolgan.
Binoning o‘zi 1854-yilda kolonial uslubda qurilgan. Klivlend 1897-yilda ikkinchi prezidentlik muddati yakunida ushbu xonadonga ko‘chib kelgan va 1908-yilda vafotigacha shu yerda yashagan.
Bu davr mobaynida u Prinston jamiyatining faol a’zosi bo‘lib, universitet professorlari va talabalar bilan yaqin aloqada bo‘lgan, hatto tug‘ilgan kuni munosabati bilan talabalardan serenadalar eshitgan. Uyning ichida prezidentning sevimli mashg‘ulotlari — bilyard va “Poverty Club” nomli o‘yinlar uchun mo‘ljallangan xonalar ham saqlangan.
2004-yilda uy arxitektor Maks Hayden tomonidan restavratsiya qilinib, Viktoriya davridagi asl ko‘rinishi qaytarilgan. 2015-yilda esa u 4,325 million dollarga sotilib, zamonaviy oshxona, aqlli uy tizimlari va boshqa qulayliklar bilan jihozlangan.
Mazkur uy arxitektura yodgorligi sifatida AQShning tarixiy obidalari ro‘yxatiga olingan.
Izoh (0)