Qozog‘istonning Olmaota viloyatida 5 sutkadan buyon yo‘qolgan EC-145 vertolyoti ekipajini qidirish ishlari davom etmoqda. Bu haqda mamlakat Mudofaa vazirligi xabar berdi.
Ma’lum qilinishicha, qidiruv ishlarini murakkab suvosti relyefi, loyqa tubi va nol ko‘rish masofasi qiyinlashtirmoqda.
Shunday bo‘lsa-da, 25-iyulda yo‘qolgan havo mudofaasi kuchlarining EC-145 vertolyotida bo‘lgan barcha odamlarning joylashuvini aniqlash bo‘yicha qidiruv-qutqaruv operatsiyasi kechayu kunduz to‘xtovsiz davom etmoqda, dedi Izbasov.
Qidiruv hududida aviatsiya general-leytenanti Dauren Kosanov yo‘qolgan uchuvchilarning qarindoshlari bilan uchrashgan. U oilalarga hamdardlik bildirgan va operatsiya uzluksiz davom etayotganini aytgan.
Biz oxirigacha harakat qilamiz, qancha vaqt kerak bo‘lsa, shuncha qidiramiz. Qarindoshlar va yaqinlarga har tomonlama yordam ko‘rsatilmoqda, har kuni aloqadamiz va fojia sabablarini aniqlash hamda yo‘qolgan yigitlarni topish uchun qo‘limizdan kelgan barcha ishni qilmoqdamiz, dedi mudofaa vaziri.
Qidiruv ishlariga 400 dan ortiq kishi, kinologlar (itlar), 70 dan ortiq yer usti texnikasi, 21 ta suzish vositasi, 10 ta dron, suv osti skanerlash vositalari jalb qilingan.
Vertolyotning yo‘qolishi
25-iyul kuni Olmaota viloyatida EC-145 harbiy vertolyoti radarlardan yo‘qoldi. 26-iyul kuni aviatexnikaning qoldiqlari Sorbuloq ko‘li akvatoriyasidan topildi. Qidiruv-qutqaruv ishlariga yuzlab odamlar, o‘nlab texnikalar, dronlar, suv osti qurilmalari, havo kemalari va maxsus uskunalar jalb qilindi.
Vertolyot ekipaji a’zolarining qarindoshlari videomurojaat yozib, jamoatchilik va rasmiy idoralardan ushbu fojiaga e’tibor qaratishni so‘radi. Bortda uch kishi bo‘lgani aytilmoqda.
Izoh (0)