Turkiya o‘zining eng kuchli yadroviy bo‘lmagan aviabombalari — “Gazap” (G‘azab) va “Hayalet” (Sharpa)ni ilk bor jamoatchilikka namoyish qildi. 970 kilogramm og‘irlikdagi bombalar Istanbulda o‘tkazilgan “IDEF–2025 xalqaro mudofaa ko‘rgazmasi”da taqdim etildi. Bu haqda Daily Sabah xabar berdi.
Ta’kidlanishicha, Turkiya Mudofaa vazirligi tarkibidagi ilmiy-tadqiqot markazi tomonidan ishlab chiqilgan “Gazap” bir metrga 10 dan ortiq portlovchi parcha tarqata oladi. Bu avvalgi texnikalarga nisbatan 3 barobar ko‘proq vayronagarchilikka olib keladi. “Gazap” F-16 qiruvchi samolyotlaridan tashlashga mo‘ljallangan.
“Bombaning zarba kuchi va portlash samaradorligi oshirildi. Texnikaning sertifikatlash ishlari ham tugatilib, foydalanishga shay holatda”, dedi rasmiylar.
Shuningdek, ko‘rgazmada yana bir og‘ir bomba — NEB-2 “Hayalet” ham namoyish etildi. Uning ham og‘irligi 970 kilogramm bo‘lib, yerosti inshootlari, ayniqsa betonli bunkerlarga qarshi kurashish uchun mo‘ljallangan.
“Oddiy AQSH texnikalari 2,4 metrli standart betonni teshib o‘tadi. ‘Hayalet’ esa 7 metr chuqurlikdagi, 3 barobar mustahkamroq betonni ham yorib kiradi”, deya izoh berildi.
Sinov doirasida NEB-2 bombasi orolga tashlangan. Natijada u 90 metr chuqurlik hosil qilib, orolda yer ko‘chkilariga, gaz sizib chiqishiga va katta toshlarning parchalanishiga olib kelgan. Portlash jarayoni odatda 25 millisoniya davom etadi. “Hayalet”da bu vaqt 240 millisoniyaga cho‘zilib, portlash kuchini yanada oshirishga erishilgan.
Izoh (0)