O‘zbekiston hukumati Mobiuz uyali aloqa operatorini sotishdan 300 million dollar daromad olishni rejalashtirmoqda. Bu haqda Bloomberg nashri xabar bermoqda.
Nashr manbalariga ko‘ra, Qatar, Saudiya Arabistoni, Ozarbayjon va Yevropadan bo‘lgan investorlar tomonidan dastlabki qiziqish bildirgan.
Mobiuz bo‘yicha savdo jarayoni joriy yil iyun oyida e’lon qilingan va qiziqish bildirish bo‘yicha arizalarni (EoI) yuborish uchun so‘nggi muddat 2025-yil 1-avgust. Ushbu bitim bo‘yicha Rothschild & Co. strategik va moliyaviy maslahatchi sifatida jalb etilgan.
Ta’kidlanishicha, Mobiuz’ning sotilishi prezident Shavkat Mirziyoyev tomonidan e’lon qilingan keng ko‘lamli xususiylashtirish dasturi doirasida amalga oshirilmoqda. Rejalarga ko‘ra, 2026-yil oxiriga qadar energetika, telekommunikatsiya, bank va transport sohalaridagi 29 ta yirik kompaniyadagi davlat ulushlarini sotuvga qo‘yiladi. 2025-yilda hukumat xususiylashtirishdan kamida 10 trillion so‘m (taxminan 786 million dollar) daromad olishni kutmoqda.
Fitch Solutions/BMI ma’lumotlariga asosan, 2024-yil oxirida Mobiuz’ning ulushi umumiy mobil foydalanuvchilar sonining 20,9 foizini, ya’ni mamlakatdagi 35,6 million abonentning taxminan 7,4 millionni tashkil etgan. Asosiy raqobatchilar — Uztelecom, Ucell (Coscom) va Beeline (Unitel) hisoblanadi. Kompaniya 2024-yilda 164 million AQSH dollari miqdorida sof daromad (net revenue) va 41 million AQSH dollari EBITDA ko‘rsatkichini qayd etgan.
Kompaniya 2014-yilda Rossiyaning MTS va O‘zbekiston davlat radioaloqa, radioeshittirish va televideniye markazi o‘rtasidagi qo‘shma korxona sifatida tashkil etilgan. Operatorning tashkil etilishi 2012-yilda MTSning sho‘ba korxonasi “O‘zdunrobita” litsenziyasi bekor qilinganidan keyingi kelishuvlarning bir qismi bo‘lgan. 2019-yildan boshlab Mobiuz to‘liq davlat nazoratiga o‘tgan.
2020-yilda Mobiuz’ni xususiylashtirishga tayyorlash rejalari e’lon qilindi. Oradan bir yil o‘tib, Mobiuz’ni 2023-yilning apreligacha xususiylashtirish rejalashtirilgandi. Ushbu kompaniyadagi davlat ulushini sotish vazifasi prezidentning 2025-yil 21-apreldagi qarorida ham belgilangan.
Izoh (0)