Yuz — organizmning ichki holatini aks ettiradi va gohida unga hayotiy muhim vitaminlar yetishmasligidan darak berishi mumkin. Teridagi o‘zgarishlar, yuz rangining xiralashishi, husnbuzarlar, ko‘z ostidagi qora doiralar va terining boshqa shikastlanishlari tananing ba’zi vitaminlarga ehtiyoji borligini ko‘rsatadi.
B12 vitamini yetishmasligi
Qizil qon tanachalarining shakllanishida asosiy rol o‘ynaydigan B12 vitamini yetishmasligi yuz terisining holatiga sezilarli ta’sir ko‘rsatishi mumkin, bu uning tanadagi metabolizmining umumiy buzilishini aks ettiradi. Asosiy belgi teri rangining oqarishi yoki kulrang tusga kirishi bo‘lib, bu eritrotsitlar sonining kamayishi bilan bog‘liq, buning natijasida esa to‘qimalarga kislorod oqimi kamayadi. Rangparlik umumiy holsizlik va charchoq bilan birga kuzatilishi mumkin.
Folat kislotasi yoki temir yetishmovchiligi
Qonning asosiy hujayralari sintezida ishtirok etadigan yana bir muhim komponent — folat kislota yoki temir yetishmasligi ham taxminan shunday simptomatika bilan qayd etiladi, uning kamligi ham hujayralarning kislorod tanqisligiga olib keladi.
A vitamini yetishmasligi
A vitamini yetishmovchiligi esa birinchi navbatda terining quruqlashishi va po‘st tashlashi bilan namoyon bo‘ladi, u zaiflashadi va ta’sirlanishga, akne paydo bo‘lishiga moyil bo‘lib qoladi. Terida paydo bo‘lgan har qanday yaralar juda uzoq vaqt davomida bitadi. Buning sababi shundaki, retinol epiteliy hujayralarining me’yoriy differensiatsiyasini qo‘llab-quvvatlashda, teri yog‘i ishlab chiqarishni tartibga solishda muhim rol o‘ynaydi, bu esa antioksidant himoyani ta’minlaydi va yoshlikni uzaytiradi.
E vitamini yetishmasligi
E vitamini yetishmasligi terining to‘siq funksiyasi buzilishiga olib keladi, bu esa dermaning suv yo‘qotishi ko‘payishiga olib keladi. Teri atrof-muhitning ultrabinafsha nurlanish va ifloslanish kabi noqulay omillari ta’siriga ko‘proq sezgir bo‘lib qoladi. Bu A vitamini yetishmovchiligiga o‘xshash alomatlar — quruqlik, po‘st tashlash, shikastlanishlarning yomon tiklanishi va ta’sirlanishga moyillik bilan namoyon bo‘ladi.
C vitamini yetishmovchiligi
Yuz terisining holatiga askorbin kislotasi yoki C vitamini yetishmasligi kuchli ta’sir ko‘rsatadi. Bu vitamin sog‘lom, elastik va yorqin yuz terisining asosini tashkil etuvchi kollagen sintezida asosiy rol o‘ynaydi. Terida C vitamini yetishmovchiligining eng xarakterli ko‘rinishlaridan biri yaralar va shilinishlarning bitish jarayonlari sekinlashuvidir. Kollagen sintezining buzilishi terining mustahkamligi va elastikligining pasayishiga olib keladi, bu esa uni shikastlanishlarga ko‘proq moyil qiladi va to‘qimalarning tiklanishini sekinlashtiradi.
Yana bir ko‘zga tashlanadigan belgi teri ostida mayda qon quyilishlar petexiyalar va ekximozlarning (bu teri yoki shilliq qavatlarga qon quyilishi turlari bo‘lib, ular o‘lchamiga ko‘ra farqlanadi) paydo bo‘lishidir. C vitamini kapillyarlar devorini mustahkamlaydi va uning yetishmasligi, mo‘rtligi va o‘tkazuvchanligining oshishiga olib keladi, bu esa gemorragik toshmalarning shakllanishiga yordam beradi.
K vitamini yoki filloxinon yetishmasligi
Qon quyilishiga moyillikning ortishi, ya’ni petexiyalar, ekximozlar yoki purpuralar (har xil kattalikdagi ko‘plab qon quyilishlar) ko‘rinishida namoyon bo‘lishi, ko‘z osti qora dog‘lar ko‘payishi K vitamini yoki filloxinon yetishmasligidan dalolat berishi mumkin.
Ushbu o‘zgarishlar qon ivish jarayonlarining buzilishi bilan bog‘liq bo‘lib, bunda filloxinon muhim rol o‘ynaydi.
B va rux vitamini yetishmovchiligi
Ko‘pchilikka ma’lum bo‘lgan og‘iz chetlaridagi yoriqlar, eroziyalar va qizarishlar paydo bo‘lishi bilan tavsiflangan yallig‘lanishli shikastlanishlar B guruhi vitaminlari, birinchi navbatda riboflavin (B2) yetishmasligining o‘ziga xos belgisidir. Organizmda rux yetishmovchiligi esa ushbu holatni yanada yomonlashtiradi.
Foydali vitaminlar yetishmovchiligining ko‘plab ko‘rinishlari o‘ziga xos emas, ya’ni boshqa ko‘plab kasalliklarda ham uchrashi mumkin. Shunday ekan, aniq tashxis uchun shifokorga murojaat qilish va vitaminlar hamda mikroelementlar yetishmovchiligini tasdiqlovchi yoki rad etuvchi zarur qon tahlillarini topshirish va shundan keyingina davolanishni boshlash kerak.
Izoh (0)