Komediya va melodrama janridagi “Zita va Gita” filmi Hindistonning “Disko raqqosi” filmi bilan bir qatorda eng mashhur loyihalardan biriga aylangan. Kartina Hindistonda 1972-yilda ekran yuzini ko‘rgan.
Bolaligida ajralib qolgan, keyinchalik taqdir taqozosi bilan hayotlarini almashtirib yuborgan egizak opa-singillar — Zita va Gita haqida hikoya qiluvchi film unda rol ijro etgan aktyorlarning faoliyatida yorqin iz qoldirdi. Ba’zilariga esa loyiha nafaqat e’tirof va mashhurlik, balki shaxsiy hayotda ham baxt olib keldi. Quyida mashhur film bosh qahramonlarini gavdalantirgan aktrisa va aktyorlarning hayoti qanday kechgani haqida so‘z yuritiladi.
Hema Malini
Zita va Gita obrazlarini bir vaqtda ijro etgan aktrisa Hema Malini film suratga olinayotgan paytda 24 yoshda bo‘lgan, biroq u allaqachon hind kinosida o‘zini ko‘rsatishga ulgurgan edi. Uning debyuti 1965-yilda tamil tilidagi kichik rollardan boshlangan. Malini 17 yoshga to‘lganida “Panda bu dunyoni tark etadi” filmida raqqosa sifatida debyut rol ijro etdi. Birinchi rol yosh aktrisaga u qadar katta shon-shuhrat keltirmagan bo‘lsa-da, raqqosalik iste’dodi darhol tomoshabin nazariga tushdi. Oradan bir necha yil o‘tib, u hind tilidagi filmlarda suratga tusha boshladi.
So‘ng aktrisa 1968-yilda “Orzular sotuvchisi”, “Voris” va “Mening ismim Jonni” filmlari bilan hind kinosining asosiy yulduziga aylandi. “Zita va Gita” esa Hemani Bollivudning yuziga aylantirdi. Bu rol uchun Malini “Filmfare” mukofotiga sazovor bo‘ldi. Keyinchalik aktrisa ushbu mukofotga bir necha bor nomzod bo‘ldi, biroq avvalgi muvaffaqiyatini takrorlay olmadi.
Dastlab Zita va Gita obrazini yaratish Bollivudning o‘sha vaqtdagi eng mashhur aktrisasi Mumtozga taklif qilingan. Biroq aktrisa kam gonorar tufayli filmda rol ijro etishni rad qilgan. Shundan so‘ng bu rol Hema Maliniga nasib qilgan. Filmda aktrisa ikki xil xarakterli obrazlarni shunchalik ishonarli tarzda o‘ynadiki, ko‘plab tomoshabinlar Zita va Gita obrazlarini bir-biriga o‘xshash ikki xil aktrisa gavdalantirgan, deb o‘ylashgan edi.
1990-yillarda u rejissyorlik va prodyuserlik bilan shug‘ullandi, 2003-yilda Hindiston parlamentining yuqori palatasiga deputat etib saylandi va 2010-yilda partiyaning bosh kotibi lavozimini egalladi. Shu bilan birga, 2010-yillarning oxirigacha filmlarda suratga tushishda davom etdi. Hozirga qadar uning hisobida kino va televideniyedagi 160 dan ortiq loyiha mavjud.
Dxarmendra
Filmda Gitaning do‘sti va keyinchalik Zitaning turmush o‘rtog‘i bo‘lgan Raka obrazini Dxarmendra ijro etgan. Film suratga olinayotgan vaqtda u allaqachon o‘n yillik faoliyatga ega mashhur aktyor bo‘lgan va Hema Malini ikkisi o‘rtasida romantik munosabatlar boshlangan.
O‘sha paytda Dxarmendra uylangan va to‘rt nafar farzandi bor edi, Malinini esa aktyor Sanjiv Kumar (Ravi) yaxshi ko‘rardi va hatto unga uylanishni taklif qilgan edi. Ammo Hema va Dxarmendra o‘rtasida paydo bo‘lgan his-tuyg‘ular vaziyatdan kuchliroq bo‘ldi. Ularning munosabati sekin rivojlandi: Hema Kumarning his-tuyg‘ulariga ozor bermaslik uchun o‘zining mehrini ochiqchasiga namoyish qilishdan qo‘rqardi, sherigi esa diniy qonunlarga ko‘ra rafiqasi bilan ajrasholmas edi.
Nihoyat, 1980-yilda juftlik rasmiy ravishda turmush qurdi. Ikkinchi marta turmush qurish uchun Dxarmendra hatto Islomni qabul qildi. O‘shandan beri aktyorlar Bollivud tarixidagi eng taniqli juftliklardan biri bo‘lib qolishdi. Ular o‘z faoliyati davomida birga 35 ta filmda suratga tushgan.
Dxarmendraning kino sohasidagi faoliyati qariyb 60 davom etgan. U 300 dan ortiq filmda rol o‘ynagan va kassabop filmlar soni bo‘yicha rekord o‘rnatgan. 1987-yilda u bir yilda 7 ta hit filmda suratga tushib, bu boradagi rekordni hanuz saqlab turibdi. Hozirda 89 yoshda bo‘lishiga qaramay, u faoliyatini yakunlaganini rasman e’lon qilmagan. So‘nggi paytlarda esa har yili 1–2 filmda ishtirok etmoqda.
Sanjiv Kumar
Zitaning bo‘lajak turmush o‘rtog‘i Ravi obrazini iqtidorli aktyor Sanjiv Kumar ijro etgan. 1972-yilga kelib u allaqachon Hindistonning eng nufuzli milliy kino mukofoti “Filmfare” ning “Ikkinchi darajali eng yaxshi aktyor” nominatsiyasi sovrindori edi.
Sanjiv Kumar har qanday yoshdagi obrazlarni muvaffaqiyatli ijro eta olgan ko‘p qirrali aktyor bo‘lgan. U komedik, dramatik va fojiaviy rollarni baravar ijro eta olgan. Ingliz, hind va gujarat tillarini erkin bilgan aktyor sifatida u turli shtatlardagi rejissyorlar bilan ishlash imkoniga ega edi. Shuningdek, u ko‘plab tamil filmlarining remeyk versiyalarida ham ishtirok etgan.
25 yillik faoliyati davomida u 170 ga yaqin filmda suratga tushdi. Afsuski, yurak bilan bog‘liq muammolar uning faoliyatiga to‘sqinlik qildi. 1985-yilda ikkinchi infarkt oqibatida vafot etdi. U atigi 47 yoshda edi.
Manorama
Filmning bosh yovuz obrazi — Zitaning ochko‘z kelinoyisi Kaushalyani aktrisa Manorama (asl ismi Erin Issak Deniyels) ijro etgan. U filmda o‘z farzandlari bilan Zitaning hisobidan yashaydigan, uning mol-mulkini egallamoqchi bo‘lgan shafqatsiz kelinoyi obrazini gavdalantiradi. Aynan Kaushalyaning doimiy zo‘ravonligi Zitaning uyidan qochishiga sabab bo‘ladi va shu voqea film syujetining burilish nuqtasiga aylanadi.
Manorama 1926-yil 16-avgustda Laxorda dunyoga kelgan. Uning onasi irland, otasi esa nasroniy-hindu bo‘lgan. Manoramaning asl ismi Erin Issak Deniels bo‘lib, ota-onasi musiqa bilan shug‘ullangan, shuning uchun Erin mumtoz raqs va musiqani o‘rganib ulg‘aygan.
U yoshligidan sahnalarga chiqishni boshlagan va bir kuni taniqli rejissyor R.K.Shorining nazariga tushgan. Qizning raqslarini ko‘rgan rejissyor otasidan bo‘lajak aktrisani filmlarda rol ijro etishiga ruxsat olgan va unga Manorama ismini bergan. O‘sha vaqtda u 10 yoshda bo‘lgan. U birinchi bo‘lib, “Xazanchi” filmida suratga tushgan. Yillar davomida Manorama Panjobda eng talabgir aktrisalardan biriga aylangan.
1947-yilda Hindiston Britaniyadan mustaqil bo‘lib chiqqach, turmush o‘rtog‘i — aktyor Rajan Haksar bilan Bombeyga ko‘chadi. Tez orada u salbiy, ammo kulgili rollar ijrochisi sifatida tanila boshlaydi va “Zita va Gita”dagi roli aynan shu qiyofaning yorqin namunasi bo‘ladi.
1990-yillarda u Dehliga ko‘chib o‘tadi va seriallarda suratga tushishni boshlaydi, biroq katta muvaffaqiyatga erisholmaydi. 2007-yilda insultga uchragan Manorama gapirish qobiliyatini yo‘qotadi. 2008-yilning fevralida esa ikkinchi insult oqibatida hayotdan ko‘z yumadi.
Izoh (0)