Xitoyda ishga borishni xohlamaydigan odamlarga yordam ko‘rsatadigan klinika o‘z faoliyatini boshladi. Bu haqda South China Morning Post xabar bermoqda.
Klinikaning maqsadi kasbiy charchoq, hissiy holdan toyish, tashvish yoki o‘z ishining befoydaligini his qilishdan aziyat chekayotgan odamlarga yordam ko‘rsatish hisoblanadi.
Yangi ambulator shakl Xebey viloyatidagi Xitoy va G‘arb integrativ tibbiyot shifoxonasi negizida yo‘lga qo‘yilgan.
Klinika g‘oyasi ilgari tashkil etilgan “Maktabga borishni istamaydiganlar uchun klinika” loyihasidan kelib chiqqan bo‘lib, u o‘qish bilan bog‘liq hissiy qiyinchiliklar va stressga duchor bo‘lgan bolalarni qo‘llab-quvvatlash uchun ochilgan edi. Shifokorlarning aytishicha, aynan farzandlarini u yerga olib borgan ota-onalar kattalar uchun ham xuddi shunday xizmat yaratish taklif qilingan.
“Ilgari ota-onalar bolalari bilan bizning ‘maktab’ klinikamizga kelganida ko‘pchilik ‘Kattalar uchun shunga o‘xshash narsa bormi? Biz ham ishga borishni istamaymiz’, deb so‘rashardi”, deydi shifoxonaning uyqu va psixologiya bo‘limi boshlig‘i, yangi klinika rahbari Yue Limin.
Uning so‘zlariga ko‘ra, mutaxassislar surunkali charchoq, hissiy beqarorlik yoki mehnatga bo‘lgan ishtiyoqini yo‘qotgan odamlarga yordam beradi. Shu bilan birga, klinikada bosimni kamaytirish va bemorlarni stigmatizatsiya qilishdan qochish maqsadida “xavotirli buzilish” yoki “depressiya” kabi rasmiy tashxislardan o‘zlarini tiyishga harakat qilishadi.
“Biz odamlarga birinchi qadamni qo‘yish va yordam so‘rash osonroq bo‘lishi uchun ataylab shunday nom tanladik. Chunki tashqi alomatlar ortida ko‘pincha murakkab psixologik yoki ijtimoiy sabablar yashiringan bo‘ladi. Bizning vazifamiz ularni aniqlash, holatni baholash, aniq tashxis qo‘yish va individual davolashni taklif etishdir”, deb tushuntiradi Yue.
Tashxis bemor bilan suhbatni, shuningdek, gipertireoz kabi fiziologik sabablarni istisno qilish uchun tibbiy tekshiruvni o‘z ichiga oladi. Shundan so‘ng shaxsiy terapiya rejasi tuziladi.
Ijtimoiy tarmoqlarda keng aks-sado uyg‘otganiga qaramay, klinikaga murojaat qiluvchi bemorlar oqimi hozircha kamligicha qolmoqda.
Izoh (0)