Ўзбекистон ҳукумати Mobiuz уяли алоқа операторини сотишдан 300 миллион доллар даромад олишни режалаштирмоқда. Бу ҳақда Bloomberg нашри хабар бермоқда.
Нашр манбаларига кўра, Қатар, Саудия Арабистони, Озарбайжон ва Европадан бўлган инвесторлар томонидан дастлабки қизиқиш билдирган.
Mobiuz бўйича савдо жараёни жорий йил июнь ойида эълон қилинган ва қизиқиш билдириш бўйича аризаларни (EoI) юбориш учун сўнгги муддат 2025 йил 1 август. Ушбу битим бўйича Rothschild & Co. стратегик ва молиявий маслаҳатчи сифатида жалб этилган.
Таъкидланишича, Mobiuz’нинг сотилиши президент Шавкат Мирзиёев томонидан эълон қилинган кенг кўламли хусусийлаштириш дастури доирасида амалга оширилмоқда. Режаларга кўра, 2026 йил охирига қадар энергетика, телекоммуникация, банк ва транспорт соҳаларидаги 29 та йирик компаниядаги давлат улушларини сотувга қўйилади. 2025 йилда ҳукумат хусусийлаштиришдан камида 10 триллион сўм (тахминан 786 миллион доллар) даромад олишни кутмоқда.
Fitch Solutions/BMI маълумотларига асосан, 2024 йил охирида Mobiuz’нинг улуши умумий мобил фойдаланувчилар сонининг 20,9 фоизини, яъни мамлакатдаги 35,6 миллион абонентнинг тахминан 7,4 миллионни ташкил этган. Асосий рақобатчилар — Uztelecom, Ucell (Coscom) ва Beeline (Unitel) ҳисобланади. Компания 2024 йилда 164 миллион АҚШ доллари миқдорида соф даромад (net revenue) ва 41 миллион АҚШ доллари EBITDA кўрсаткичини қайд этган.
Компания 2014 йилда Россиянинг MTS ва Ўзбекистон давлат радиоалоқа, радиоэшиттириш ва телевидение маркази ўртасидаги қўшма корхона сифатида ташкил этилган. Операторнинг ташкил этилиши 2012 йилда MTS’нинг шўба корхонаси “Ўздунробита” лицензияси бекор қилинганидан кейинги келишувларнинг бир қисми бўлган. 2019 йилдан бошлаб Mobiuz тўлиқ давлат назоратига ўтган.
2020 йилда Mobiuz’ни хусусийлаштиришга тайёрлаш режалари эълон қилинди. Орадан бир йил ўтиб, Mobiuz’ни 2023 йилнинг апрелигача хусусийлаштириш режалаштирилганди. Ушбу компаниядаги давлат улушини сотиш вазифаси президентнинг 2025 йил 21 апрелдаги қарорида ҳам белгиланган.
Изоҳ (0)