Rossiyaning sobiq transport vaziri Roman Starovoyt Odinsovo shahrida o‘lik holda holda topildi. Bu haqda Rossiya Federatsiyasi Tergov qo‘mitasi rasmiy vakili Svetlana Petrenko ma’lum qildi.
“Bugun Odinsovo shahar okrugida Rossiya Federatsiyasining sobiq transport vaziri Roman Vladimirovich Starovoytining shaxsiy avtomobilida o‘qotar quroldan jarohat olgan jasadi topildi. Rossiya Tergov qo‘mitasining Moskva viloyati bo‘yicha Bosh tergov boshqarmasi xodimlari voqea joyida ishlayapti, hodisa tafsilotlari aniqlanmoqda. Asosiy versiya — o‘z joniga qasd qilish”, dedi u.
7-iyul kuni prezident Vladimir Putin Starovoytni transport vaziri lavozimidan ozod etish to‘g‘risidagi farmonni imzoladi. Vazirlik rahbari vazifasini vaqtincha bajaruvchi etib vazir o‘rinbosari, Novgorod viloyatining sobiq gubernatori Andrey Nikitin tayinlandi. Starovoyt vazirlik lavozimida bir yildan sal ko‘proq ishlagan edi.
Rossiya prezidenti matbuot kotibi Dmitriy Peskov Starovoytning iste’fosi ishonchning yo‘qolishi bilan bog‘liq emasligini va farmonda bunday ta’rif yo‘qligini ta’kidlagan.
Ma’lumotlariga ko‘ra, uning ishdan olinishiga Ukraina bilan chegarada mudofaa inshootlarini qurish chog‘ida budjetdan kamida bir milliard rubl o‘g‘irlash bo‘yicha jinoiy ish yuzasidan qamoqqa olingan Kursk viloyatining sobiq gubernatori Aleksey Smirnov Starovoytga qarshi ko‘rsatma bergani sabab bo‘lishi mumkin.
Starovoyt 1972-yil 20-yanvarda Kurskda tug‘ilgan. 2012—2018-yillarda “Rosavtodor”ga rahbarlik qilgan. 2018-yil sentyabr—oktyabr oylarida Rossiya Federatsiyasi transport vazirining o‘rinbosari lavozimida ishlagan, biroq o‘sha yilning 11-oktyabrida Kursk viloyati gubernatori vazifasini vaqtincha bajaruvchi etib tayinlangan. 2019-yil sentyabr oyida 81,07 foiz ovoz bilan viloyat rahbari etib saylangan. 2024-yil 14-mayda Transport vazirligiga rahbar etib tayinlangan.
Izoh (0)