Rossiya Ukrainadagi harbiy amaliyotlarning hozirgi ko‘lamini kamida 2027-yilgacha saqlab qolishi mumkin. Bu haqda NATO sammitida ma’lum qilindi.
Rossiya iqtisodiyoti o‘sib borayotgan ichki qiyinchiliklarga qaramay, urushni yana bir necha yil moliyalashtirishi mumkin. Biroq NATO, rus mudofaa sanoati “bazo‘r ishlayotgani”ni va qurol ishlab chiqarishni yanada ko‘paytirishning iloji yo‘qligini ta’kidlagan.
NATOning yuqori martabali amaldorlariga ko‘ra, G‘arbning diplomatik sa’y-harakatlari urushni tugatishga olib kelmagan. Prezident Vladimir Putin esa qisqa muddatli kelishuvlardan manfaatdor. Bu kelishuv Moskvaga yengillik berish va bosib olingan hududlar ustidan nazoratni saqlab qolishni anglatadi.
Alyansning ta’kidlashicha, Putin urushda g‘alaba qozonayotganiga ishonadi. Bu Rossiya razvedka xizmatlari Kremlga taqdim etayotgan noto‘g‘ri ma’lumotlar natijasi ekani aytilgan. Bundan tashqari, Ukraina armiyasida kadrlar yetishmovchiligi mavjudligi ham ta’kidlab o‘tilgan.
“Bu qanchalik muhim ekani Ukrainaning harakatlariga bog‘liq. Mamlakat aniq qarorga kelishi kerak”, dedi alyans vakili.
Aprel oyida AQSH Urushni o‘rganish instituti tahlilchisi Jorj Barros Rossiya urushni hozirgi ko‘rinishda yana 12 oydan 16 oygacha davom ettirishi mumkinligini aytgan edi. Shundan so‘ng, Kremlda byudjet resurslari va kadrlar zaxiralari, jumladan, hozirda “saxiy” to‘lovlar evaziga frontga jalb qilinayotgan ko‘ngillilar soni keskin kamayishi aytilgan.
Putin 24-iyun kuni 2025-yil uchun federal byudjetga kiritiladigan o‘zgartirishlar haqida hujjatni imzolagan. Bu iqtisodiy qiyinchiliklar o‘sib borayotganini ko‘rsatadi. Hujjatga ko‘ra, rejalashtirilgan neft va gaz daromadlari deyarli to‘rtdan bir qismga qisqaradi. Shu tariqa kutilgan 10,8 trillion rubl o‘rniga byudjetga atigi 8,3 trillion rubl tushadi. Byudjetni muvozanatlashtirish uchun hokimiyat iqtisodiyotni qo‘llab-quvvatlashga qaratilgan 5 ta yirik davlat dasturi xarajatlarini qisqartirmoqda.
Izoh (0)