Ukraina tashqi ishlar vaziri Dmitriy Kuleba 15-aprel kuni NATOni Rossiya taʼsiriga qarshi turish uchun Qora dengiz mintaqasiga nisbatan keng qamrovli strategiyani amalga oshirishga chaqirdi. Bu haqda “Ukrinform” nashri xabar berdi.
Manbada aytilishicha, Kuleba NATOni Qora dengizda faollashishga va Rossiyani dengizdan bo‘g‘ishga chaqirgan. Bu tadbirlar muvaffaqiyatli bo‘lishiga ishonch bildirgan.
“NATO Rossiyaning zararli taʼsirini kamaytirish va mintaqaviy barqarorlikni oshirishga qaratilgan alohida, keng qamrovli va ambitsiyali Qora dengiz strategiyasini faol ravishda amalga oshirishi kerak”, — degan Dmitriy Kuleba Bolgariyada bo‘lib o‘tgan Xalqaro Qrim platformasining Qora dengiz xavfsizligi bo‘yicha ikkinchi konferensiyasidagi videomurojaatida.
Ukraina tashqi idorasi vakili NATOning Boltiq va Qora dengiz qanotini Rossiyaga qarshi mustahkam himoya devori sifatida taʼkidlagan. Bu qanotning mintaqaga barqarorlik va tinchlik olib kelishi hamda mintaqa davlatlarining iqtisodiy va savdo o‘sishidan foydalanishiga imkon berishini bildirgan.
“Talab qilinadigan narsa — umumiy maqsadlarimizga erishish uchun qarash, strategiya va umumiy harakatlarda qatʼiylik. Qora dengiz NATO, tinchlik va barqarorlik dengiziga aylanishi kerak”, — degan tashqi ishlar vaziri.
Kuleba NATO rahbariyatiga yuzlanib, ittifoq Ukraina va Gruziyaga ko‘proq eʼtibor qaratishi kerakligini aytgan. Busiz Qora dengiz strategiyasi amalga oshmasligini bildirgan.
“Faqat Rossiyaning mag‘lubiyati va Ukraina suvereniteti va hududiy yaxlitligining to‘liq tiklanishi Qora dengiz mintaqasiga barqarorlik, xavfsizlik va kuchli iqtisodiy rivojlanish istiqbolini olib kela oladi. Ukraina yetarli darajada qo‘llab-quvvatlansa, bunday natijaga erisha olamiz”, — degan Kuleba.
Izoh (0)