Россия Украинадаги ҳарбий амалиётларнинг ҳозирги кўламини камида 2027 йилгача сақлаб қолиши мумкин. Бу ҳақда НАТО саммитида маълум қилинди.
Россия иқтисодиёти ўсиб бораётган ички қийинчиликларга қарамай, урушни яна бир неча йил молиялаштириши мумкин. Бироқ НАТО, рус мудофаа саноати “базўр ишлаётгани”ни ва қурол ишлаб чиқаришни янада кўпайтиришнинг иложи йўқлигини таъкидлаган.
НАТОнинг юқори мартабали амалдорларига кўра, Ғарбнинг дипломатик саъй-ҳаракатлари урушни тугатишга олиб келмаган. Президент Владимир Путин эса қисқа муддатли келишувлардан манфаатдор. Бу келишув Москвага енгиллик бериш ва босиб олинган ҳудудлар устидан назоратни сақлаб қолишни англатади.
Альянснинг таъкидлашича, Путин урушда ғалаба қозонаётганига ишонади. Бу Россия разведка хизматлари Кремлга тақдим этаётган нотўғри маълумотлар натижаси экани айтилган. Бундан ташқари, Украина армиясида кадрлар етишмовчилиги мавжудлиги ҳам таъкидлаб ўтилган.
“Бу қанчалик муҳим экани Украинанинг ҳаракатларига боғлиқ. Мамлакат аниқ қарорга келиши керак”, деди альянс вакили.
Апрель ойида АҚШ Урушни ўрганиш институти таҳлилчиси Жорж Баррос Россия урушни ҳозирги кўринишда яна 12 ойдан 16 ойгача давом эттириши мумкинлигини айтган эди. Шундан сўнг, Кремлда бюджет ресурслари ва кадрлар захиралари, жумладан, ҳозирда “сахий” тўловлар эвазига фронтга жалб қилинаётган кўнгиллилар сони кескин камайиши айтилган.
Путин 24 июнь куни 2025 йил учун федерал бюджетга киритиладиган ўзгартиришлар ҳақида ҳужжатни имзолаган. Бу иқтисодий қийинчиликлар ўсиб бораётганини кўрсатади. Ҳужжатга кўра, режалаштирилган нефть ва газ даромадлари деярли тўртдан бир қисмга қисқаради. Шу тариқа кутилган 10,8 триллион рубль ўрнига бюджетга атиги 8,3 триллион рубль тушади. Бюджетни мувозанатлаштириш учун ҳокимият иқтисодиётни қўллаб-қувватлашга қаратилган 5 та йирик давлат дастури харажатларини қисқартирмоқда.
Изоҳ (0)