“Yuksalish” harakati va “O‘zsuvtaʼminot” AJ ichimlik suvi va oqova tizimlari obyektlarida olib borilgan qurilish-montaj ishlari monitoringi jarayonida aniqlangan kamchiliklar bo‘yicha bir-birini yolg‘on maʼlumot tarqatishda ayblamoqda.
Gap nima haqda?
2024-yil yakunida aholini toza ichimlik suvi va oqova suv bilan taʼminlash bo‘yicha belgilangan vazifalarning amalga oshirilishi yuzasidan “Yuksalish” harakati tomonidan jamoatchilik monitoringi o‘tkazilgan.
Monitoringda respublika bo‘ylab 101 ta mahallada amalga oshirilishi belgilangan 99 ta loyiha tanlov yo‘li bilan o‘rganiladi. Ichimlik suvi va oqova suv tizimi bilan taʼminlanishi bo‘yicha aholi fikri o‘rganilgan.
Natijada rasmiy hisobotlarda to‘liq bajarilib, foydalanishga topshirilgan deb ko‘rsatilgan 23 ta loyiha doirasida qurilish, rekonstruksiya qilish va taʼmirlash ishlari yakuniga yetkazilmagani, 28 ta loyiha bo‘yicha obyektlar belgilangan muddatda foydalanishga topshirilmagani, 15 ta mahallada ishlar yakunlangan bo‘lishiga qaramay, taʼminot to‘liq yo‘lga qo‘yilmagani, 9 ta loyiha bo‘yicha ishlar sifatsiz bajarilgani maʼlum bo‘ldi, deyiladi harakat maʼlumotida.
“O‘zsuvtaʼminot”dan raddiya
“O‘zsuvtaʼminot” AJ eʼlon qilgan raddiyada aytilishicha, “Yuksalish” harakati maʼlumotlarni “O‘zsuvtaʼminot”dan emas, boshqa vazirlik va idoralardan olishga uringan. Bundan tashqari, ushbu o‘rganishlar davomida jamiyatning mazkur yo‘nalishdagi birorta mansabdor vakili ishtirok etmagan.
“Yuksalish” harakati tomonidan hududlardagi qurilish obyektlari noprofessional yondashuv asosida o‘rganilgan. Yaʼni har bir qurilish obyekti belgilangan tartibda loyiha-smeta hujjatlari asosida o‘rganiladi aslida. Mazkur hujjat yaʼni har bir ko‘rsatilgan manzilning loyiha-smetasi buyurtmachi, quruvchi tashkilot va loyihachida bo‘ladi. “Yuksalish” harakati tomonidan esa qanday meʼyor va parametrlar asosida o‘rganilgani ular tomonidan eʼlon qilingan materialda belgilanmagan, afsuski!
Obyektlarda davom etayotgan ishlar ham negadir “Yuksalish” harakati o‘rganuvchilarining qurilish ishlari yakunlangan, suv yo‘q, degan asossiz xulosa chiqarishiga sabab bo‘lgan, negadir!!!, deyiladi “O‘zsuvtaʼminot” raddiyasida.
Qo‘shimcha qilinishicha, o‘rganishlar ishchi guruhi tarkibida soha faoliyati haqida to‘liq maʼlumotga va dalillarga ega bo‘lmagan xodimlarning shunchaki xulosalari asosida tayyorlanganini ko‘rsatadi.
Raddiyaga raddiya
“Yuksalish” harakati “O‘zsuvtaʼminot” raddiyasiga munosabat bildirdi. Unda aytilishicha, “O‘zsuvtaʼminot” raddiyasida muammo yo‘q, deb ko‘rsatilgan obyektlardagi vaziyatga aniqlik kiritgan holda muammolar hanuzgacha saqlanib qolmoqda.
“Yuksalish” harakati o‘rganishlarni “O‘zsuvtaʼminot” taqdim etgan maʼlumotlar asosida amalga oshirgan, bu borada noxolislik va noprofessionalizmga oid ayblovlar asossiz. Aksincha, jamiyat bu borada yolg‘on axborot tarqatgan.
Aholida ichimlik suvi taʼminoti bilan bog‘liq eʼtirozlar ko‘pligi maʼlum bo‘lmoqda, deyiladi harakat raddiyasida.
Bayonotda “O‘zsuvtaʼminot” Jamoatchilik nazorati yakunlari bo‘yicha tayyorlangan takliflarni ko‘rib chiqishda hissiyotga berilmaslikni so‘ragan.
“Hissiyotli raddiya”
Harakati rahbari Bobur Bekmurodov “O‘zsuvtaʼminot” bayonotini “hissiyotli raddiya” deb atagan.
“O‘zsuvtaʼminot” jamoatchilikni chalg‘itgani o‘z yo‘liga, asosiysi barcha ro‘yxatdagi obyektlar nazoratga olindi. Suv kelmagan joylarga suv keldi, kelmagan joylarda esa tezda kelishi haqida vaʼdalar berildi. Biz shundan xursandmiz.
Bugungi O‘zbekiston aynan shu bilan ham kuchli — bugun fuqarolik jamiyati bor, bugun jamoatchilik nazorati bor.
Biz bundan buyon ham davlatimiz rahbari tomonidan belgilangan vazifalar ijrosini nazorat qilishda qatʼiy turamiz.
Vazirlik va idoralar rahbarlarini esa pastga tushib, islohotlar ijrosini aktlarga tayanib emas, o‘z qo‘li va o‘z ko‘zi bilan nazorat qilishga chaqiramiz, degan Bobur Bekmurodov.
Harakat rahbari so‘zining oxirida 16-iyun kuni prezident raisligida o‘tgan videoselektor yig‘ilishda aynan mana shu masalalarga eʼtibor qaratilganiga urg‘u bergan.
Izoh (0)