O‘zining ulkan xayriya tadbirlari bilan tanilgan Jimmi Donaldson yoki Janob Bist (Mr. Beast) ismli YouTube blogeri navbatdagi xayrli ishga qo‘l urdi. Ijtimoiy tarmoqda hech kimnikiga o‘xshamas kontent yaratuvchi bloger 100 ta uy qurish tashabbusini amalga oshirdi va ularni muhtoj oilalarga sovg‘a qildi.
Hozirda Janob Bist o‘zining keng ko‘lamli va yirik xayriya tadbirlari bilan YouTube platformasidagi eng mashhur bloger hisoblanadi. U blogerlik faoliyatidan topgan mablag‘iga minglab insonlarga moddiy yordam berib kelmoqda, jumladan, Janob Bist minglab odamlarning ko‘rish qobiliyatini tiklash va kataraktani olib tashlash bo‘yicha operatsiya xarajatlarini qoplagan. Shuningdek, u 3 million dollardan ortiq pullarni kam ta’minlangan shaxslarga tarqatgan.
Bloger Netflix’ning mashhur “Kalmar o‘yini” seriali asosida tashkil etgan o‘yinida 456 000 dollarlik sovrin uchun yuzlab insonlar kurashgan. Uning videosi 424 million martadan ortiq tomosha qilingan.
Janob Bist o‘zining qilgan sanoqsiz ezgu sa’y-harakatlariga qaramay, ko‘plab internet foydalanuvchilari tomonidan tanqidga uchraydi. YouTube orqali to‘plangan katta boyligini ijtimoiy tengsizlikka qarshi kurashda ishlatgani uchun blogerni yomonlaydigan shaxslar ham yo‘q emas. Bunday fikrlarga Jimmi Donaldson quyidagicha javob bergan:
“Biz insonlarga manfaatli bo‘lishdan charchamadik. 1000 ta ko‘z operatsiyasi, 100 ta oila uchun yangi uy, 100 ta quduq kabi xayriya harakatlaridan g‘azablanib, bularni men emas, aslida, hukumat bajarishi kerak, deyishadi. To‘g‘ri, blogerlar bunday masala bilan shug‘ullanishi bugungi kunda yot narsa. Lekin men atrofimda bo‘layotgan hodisalarga shunchaki qarab turolmayman”, deb yozdi bloger X (sobiq Twitter) saytida.
Tanqidchilarning so‘zlariga ko‘ra, bunday faoliyatga asoslangan kontent yaratish ekspluatatsiya bo‘lishi mumkin. Biroq Janob Bist bularning bari faqat yordam berish va o‘zidan yaxshilik qoldirish maqsadida qilinganini ta’kidladi hamda videolaridan tushgan barcha daromadlar shunga o‘xshash yangi loyihalarni moliyalashtirishga sarflanishini aytdi.
“Men mablag‘larni insonlarga yordam berish uchun sarflayman va o‘limimdan avval bor pulimni barchaga tarqatishga va’da beraman. Har bir so‘nggi tiyinigacha beraman”, deydi bloger.
Janob Bistning so‘nggi ezgu ishlari orasida aholini ichimlik suvi bilan ta’minlash vazifasi alohida tahsinga loyiq. U Afrikaning bir necha qashshoq yerlariga tashrif buyurib, u yerda suv olish uchun yuzta quduq qazdirdi. Bundan tashqari, u Keniya, Somali va Zimbabvedagi aholiga moliyaviy yordam berdi.
Izoh (0)