Keniyada 400 dan ortiq fuqaro o‘limida bilvosita aybdor bo‘lgan diniy sekta rahbari hibsga olindi. Bu haqda Al Jazeera nashri xabar berdi.
Manbada aytilishicha, diniy guruh boshlig‘i Pol Makkenzi qotillik aybi bilan hibsga olingan. U ayni paytda mamlakat sharqidagi Mombasa sudiga olib kelingan hamda sudgacha tergov qilish uchun tergovchiga topshirilgan.
Pol Makkenzi hozirda 400 kishi o‘limida aybdor hisoblanmoqda. “Diniy rahnamo”ga bolalarni qiynash, zo‘ravonlik va terrorizmga aloqadorlik holatlari bo‘yicha ham ayblov eʼlon qilingan.
Manbaga ko‘ra, “Xushxabar” cherkovi yetakchisi Pol Makkenzi aprel oyida o‘zining yuzlab shogirdlariga ochlikda “maʼrifat”ga erishishni buyurgan. Buning ortidan uzoq vaqt ochlik saqlagan fuqarolar orasida o‘lim holatlari yuz bera boshlagan.
Halok bo‘lganlar soni 400 dan ortib ketishi esa hukumatni jiddiy choralar ko‘rishga undagan. Politsiya aralashuvi bilan cherkov faoliyati to‘xtatilgan va sekta aʼzolari hibsga olingan.
Pol Makkenzi ayni damda fuqarolarni o‘z joniga qasd qilishga undashda ayblanmoqda. Uning shogirdlariga bergan ko‘rsatmalari ayblov eʼlon qilishga to‘la imkon beradi.
Mombasa sudida jinoyatga aloqador 90 dan ortiq boshqa shaxslarning ham ishlari ko‘rilgan. Ularga rahbarlik qilgan Pol Makkenzi sudga qadar o‘tgan barcha tergovlarda o‘ziga qo‘yilgan ayblovlarni rad etgan.
Yuz bergan dahshatli voqea Keniya hukumatini chekka hududlardagi konfessiyalar ustidan nazoratni kuchaytirishga undagan. Keniya Senati va davlat tomonidan moliyalashtiriladigan inson huquqlarini nazorat qiluvchi tashkilotlarning alohida hisobotlarida diniy guruhlar faoliyatini tartibga solish talab qilingan.
Hozircha prezident Uilyam Ruto o‘lim holatlarini tekshirish va diniy idoralarni tartibga soluvchi qoidalarni ko‘rib chiqish uchun komissiya tuzgan. Halok bo‘lganlar nima sababdan va qay tarzda vafot etganini batafsil aniqlash uchun ishlar davom ettirilmoqda.
Izoh (0)