Italiya terma jamoasining bosh murabbiyi Luchano Spaletti iste’fosidan so‘ng, uning o‘rniga tayinlanishi mumkin bo‘lgan nomzodlar nomi e’lon qilindi. The Athletic nashrining xabar berishicha, asosiy da’vogar sifatida 2006-yilgi Jahon chempioni Fabio Kannavaro ko‘rilmoqda.
51 yoshli mutaxassis faoliyati davomida “Yuventus”, “Real Madrid”, “Inter” va “Napoli” klublarida safida to‘p surgan. Uning murabbiylik faoliyatidagi so‘nggi ish joyi “Dinamo Zagreb” jamoasi bo‘lib, aprel oyida Xorvatiya klubidan ishdan bo‘shatilgan.
Italiyalik jurnalist Janluka Di Marsio bergan ma’lumotga ko‘ra, Kannavaroga asosiy raqobatchilar sifatida yaqinda murabbiylik faoliyatini yakunlab, “Roma” klubida texnik direktor lavozimini egallagan Klaudio Ranyeri hamda hozirda Saudiya Arabistonining “An-Nassr” jamoasini boshqarayotgan Stefano Pioli ko‘rsatilmoqda.
Eslatib o‘tamiz, Italiya terma jamoasi 9-iyun, dushanba kuni jahon chempionati saralashi doirasida Moldovaga qarshi maydonga tushib, 2:0 hisobida g‘alaba qozondi.
Izoh (0)