Italiyaning “Roma” klubi ustozi Klaudio Ranyeri ukrainalik hujumchi Artyom Dovbikning jarohati sabab Eldor Shomurodovning asosiy tarkibga kiritilishi haqidagi savollarga javob berdi. Bu haqida RomaPress nashri xabar bermoqda.
Men o‘yinchilarimni maydonga tushirish borasida turli xil fikrda bo‘lmaganman. U xoh Eldor bo‘lsin, xoh Artyom — ularning har biri jamoaga foyda keltirishni xohlaydi. Tanlov qilish har doim qiyin. Agar asosiy tarkibga kiritgan futbolchilar bo‘yicha xato qilsam ham, buni katta muammo deb bilmayman, chunki jamoamizdagi barcha futbolchilar o‘yinga astoydil tayyorgarlik ko‘radi, deya Ranyerining so'zlarini keltiradi RomaPress nashri.
O‘zbekistonlik futbolchi yanvar oyida jamoadan ketishi haqidagi mish-mishlarga qaramay, zaxiradan maydonga tushib, ishonchli o‘yin ko‘rsata boshladi. So‘nggi bir necha bahslarda esa asosiy tarkibda harakat qilib, jamoasining muhim gollarini kiritmoqda. Italiya chempionati 26-turi doirasidagi “Monsa”ga qarshi o‘yinda Eldor Shomurodov jamoasining birinchi goliga assistentlik qilgan bo‘lsa, ikkinchi golni o‘z hisobiga yozdirib qo‘ydi.
Ma’lumot o‘rnida, “Roma” hozirda Italiya A seriyasi 26-turidan so‘ng 40 ochko bilan 9-o‘rinni egallab turibdi.
Izoh (0)