Namanganda gaz tarmog‘iga o‘zboshimchalik bilan ulanib, davlatga 1,4 milliard so‘m zarar yetkazgan fuqaroga nisbatan jinoyat ishi qo‘zg‘atildi. Bu haqda “Daryo” muxbiri Azizbek Abduvaliyev xabar bermoqda.
Qayd etilishicha, Yangiqo‘rg‘on tumanida istiqomat qiluvchi fuqaro xususiy bog‘i hududidan o‘tgan va korxonalardan biriga tortilgan tabiiy gaz tarmog‘iga hisoblagichdan tashqari ulanib olib, 8 oy davomida foydalanib kelgan. Ushbu harakatlar bilan tuman gaz taʼminoti bo‘limiga 1,4 milliard so‘mdan ziyod zarar yetkazilgan.
Hozirda xususiy bog‘ egasiga nisbatan jinoyat ishi qo‘zg‘atilgan bo‘lib, tergov harakatlari olib borilmoqda.
Kosonsoy tuman gaz ta’minoti bo‘limi xodimi tomonidan tumandagi fuqarolardan birining ikkita yashash xonadoniga gaz tarmog‘ini ulab berish evaziga 400 dollar, 2 ta gaz hisoblagichini o‘rnatib berish uchun esa 3,5 million so‘m talab qilgan. Departamentning tuman bo‘limi bilan hamkorlikda o‘tkazilgan tezkor tadbir davomida xodim kelishilgan pullarni fuqarodan olayotgan paytda ashyoviy dalillar bilan ushlandi. Hozirda gaz taʼminoti bo‘limi xodimiga nisbatan jinoyat ishi qo‘zg‘atish masalasi ko‘rib chiqilmoqda.
Izoh (0)