Toshkent shahrida 1975-2024-yillar may oyida kuzatilgan maksimal va minimal havo harorati bo‘yicha ma’lumot berildi.
Mazkur davr mobaynida may oyidagi maksimal haroratlar odatda 33–39 daraja oralig‘ida bo‘lgan. Eng yuqori maksimal havo harorati 1986-yilda 38,7 daraja va 2004-yilda 38,6 darajada qayd etilgan.
Ayniqsa, oxirgi o‘n yillikda (2014–2024) may oyidagi maksimal harorat ko‘rsatkichlarining izchil oshib borayotgani kuzatilmoqda. Bu holat iqlim o‘zgarishlari jarayonlari ta’sirida haroratlarning yuqorilash tendensiyasi kuchayib borayotganidan dalolat beradi.
Minimal harorat ko‘rsatkichlariga to‘xtaladigan bo‘lsak, 1975–2003-yillar oralig‘ida bu ko‘rsatkichlar 0–8 daraja atrofida bo‘lgan. 2004–2024-yillar davomida esa minimal harorat darajalari sezilarli tarzda oshib, 5–12 daraja oralig‘ida kuzatilmoqda. Ayni paytgacha may oyidagi eng past harorat 1989-yilda qayd etilgan bo‘lib, ushbu yilda minimal harorat 1,7 darajagacha pasaygan.
Tahlil natijalari Toshkent shahrida may oyi davomida harorat rejimida iqlimiy o‘zgarishlar fonida sezilarli o‘sish kuzatilayotganini ko‘rsatmoqda. Bu holat iqlim barqarorligi va ekologik xavfsizlikni ta’minlash borasida tizimli choralar ko‘rishni talab etadi.
Mutaxassislarning ta’kidlashicha, bunday dinamik harorat o‘zgarishlari hududdagi agrotexnik ishlar, suv resurslari muvozanati va aholining salomatligiga ham bevosita ta’sir ko‘rsatishi mumkin. Shu munosabat bilan, atrof-muhit monitoringi, iqlimiy prognozlar aniqligini oshirish va haroratning keskin o‘zgarishlariga tayyorlik choralarini kuchaytirish zarurati ortib bormoqda.
Izoh (0)