Prezident qarori bilan Maktabgacha va maktab ta’limi vazirligi qoshida Bolalar kontentini rivojlantirish markazi tashkil qilindi. Bu haqda 15-may Shavkat Mirziyoyev raisligidagi videoselektor yig‘ilishida ma’lum qilindi.
Yig‘ilishda bolalarni zararli axborotlardan himoya qilish bo‘yicha ko‘p ishlar qilinayotgani, bu borada alohida qonun ham qabul qilingani qayd etildi.
“To‘g‘ri, bugungi kunda yoshlar ma’naviyati bilan hamma shug‘ullnayapti. Lekin zararli axborotlarga qarshi tura oladigan milliy kontent yaratish, ularni targ‘iboti, ijodkorlarni qo‘llab-quvvatlash bo‘yicha professional tashkilot yo‘q”, dedi prezident.
Shu munosabat bilan Bolalar kontentini rivojlantirish markazi tashkil qilindi. Markaz direktori etib taniqli rejissyor Jahongir Ahmedov tayinlandi.
Markaz bolalar tarbiyasi va sog‘lig‘iga salbiy ta’sir qiladigan axborot makonidagi kontentni tahlil qiladi. Mahalliy ijodkorlarga milliy kontent yaratish bo‘yicha buyurtma beradi, sohada kadr tayyorlashni tashkil qiladi. Qori Niyoziy instituti markazga ilmiy jihatdan ko‘maklashadi.
Prezident bu masalalar faqatgina bitta markazning ishi bo‘lib qolmasligi, mas’ul barcha vazirliklar markaz bilan ishlarni boshlashi shartligini ko‘rsatib o‘tdi.
Izoh (0)