Президент қарори билан Мактабгача ва мактаб таълими вазирлиги қошида Болалар контентини ривожлантириш маркази ташкил қилинди. Бу ҳақда 15 май Шавкат Мирзиёев раислигидаги видеоселектор йиғилишида маълум қилинди.
Йиғилишда болаларни зарарли ахборотлардан ҳимоя қилиш бўйича кўп ишлар қилинаётгани, бу борада алоҳида қонун ҳам қабул қилингани қайд этилди.
“Тўғри, бугунги кунда ёшлар маънавияти билан ҳамма шуғуллнаяпти. Лекин зарарли ахборотларга қарши тура оладиган миллий контент яратиш, уларни тарғиботи, ижодкорларни қўллаб-қувватлаш бўйича профессионал ташкилот йўқ”, деди президент.
Шу муносабат билан Болалар контентини ривожлантириш маркази ташкил қилинди. Марказ директори этиб таниқли режиссёр Жаҳонгир Аҳмедов тайинланди.
Марказ болалар тарбияси ва соғлиғига салбий таъсир қиладиган ахборот маконидаги контентни таҳлил қилади. Маҳаллий ижодкорларга миллий контент яратиш бўйича буюртма беради, соҳада кадр тайёрлашни ташкил қилади. Қори Ниёзий институти марказга илмий жиҳатдан кўмаклашади.
Президент бу масалалар фақатгина битта марказнинг иши бўлиб қолмаслиги, масъул барча вазирликлар марказ билан ишларни бошлаши шартлигини кўрсатиб ўтди.
Изоҳ (0)