Irlandiyaning Inishir oroli yaqinida dengizdan topilgan shishadagi xat internet foydalanuvchilari orasida katta qiziqish uyg‘otdi. Sababi — bu xabar 2021-yilda yo‘qolgan Tayvanga tegishli “Yong Yu Sing No 18” baliqchilik kemasi ekipaji bilan bog‘liqligi taxmin qilinmoqda.
Ma’lum qilinishicha, mahalliy fuqaro Metyu Laming va uning do‘sti o‘tgan haftada Inishir orolida sayr qilayotib, ichida qo‘lda yozilgan yozuvi mavjud bir butilkaga duch kelgan.
“Google Translate orqali tarjima qilganimizda, uning indonez tilida yozilgan SOS (yordam) chaqirig‘i ekani ma’lum bo‘ldi”, degan Laming Al Jazeera nashriga bergan intervyusida.
Xabar keyinchalik politsiyaga topshirilgan, biroq Laming o‘zi ham bu topilma haqida Reddit ijtimoiy tarmog‘ida ommaga e’lon qilgan. Ko‘p o‘tmay, internet foydalanuvchilari ushbu xabarni 2021-yilda yo‘qolgan tayvanlik baliqchilar kemasi bilan bog‘lagan.
Xabarda nima yozilgan edi?
Reddit foydalanuvchilaridan biri tarjima qilgan xabarda quyidagilar yozilgan:
“Yordam bering! Biz 12/20 sanasidan beri yo‘qolib qolganmiz. Biz uch kishimiz. Orolning nomini bilmaymiz. Jarohatlanganmiz. YORDAM. SALOM. SOS.”
Xabar “Li” iyeroglifi bilan yakunlangan bo‘lib, “Yong Yu Sing No 18” kemasi nomi ham keltirilgan.
Kema va ekipaj taqdiri hali ham noma’lum
Mazkur kema 2021-yil 1-yanvarda rasmiy ravishda yo‘qolgan deb e’lon qilingandi. Uning egasi kapitan bilan 2020-yil 30-dekabr kuni so‘nggi marta bog‘langan. Kema oradan ikki hafta o‘tib Tinch okeanidagi Miduey orolidan 600 km uzoqlikda topilgan, lekin ekipaj va qutqaruv qayig‘i izsiz yo‘qolgan.
Tayvan prokuraturasi voqeani rasmiy tarzda “baxtsiz hodisa” deb baholagan, biroq kapitan Li va uning 9 nafar indoneziyalik ekipaj a’zosi hozirgacha topilmagan.
Xabar soxtami yoki chin?
Lamingning Reddit’dagi posti 10 mingga yaqin layk to‘plagan. 1200 dan ortiq izohlarda foydalanuvchilar xabar haqiqiy bo‘lishi ehtimoli va kemachilar taqdiri borasida turli nazariyalarni ilgari surgan.
Tayvanda esa bu xabar jiddiy qabul qilinmoqda. “Su’Ao baliqchilar uyushmasi” hukumatni holatni tekshirishga va kerak bo‘lsa xalqaro tashkilotlar bilan hamkorlikda qidiruv-tahlil ishlarini olib borishga chaqirgan.
“Agar xabar chin bo‘lsa, hukumatga xalqaro yordamni jalb qilishda ko‘maklashamiz”, deyiladi uyushma bayonotida.
Laming esa xabar haqiqiyligiga hali ham shubha bilan qaramoqda:
“Birinchi o‘qiganimda bu hazil deb o‘ylagandim. Ammo hozir bu chin bo‘lishi mumkinligiga ishonchim ortyapti”, degan u.
Irlandiya politsiyasi topilma bo‘yicha izoh bermagan, faqatgina Inishir orolida noma’lum buyum topilgani bo‘yicha murojaat qabul qilinganini tasdiqlagan.
Izoh (0)