OFK Elit Chempionlar Ligasida qatnashayotgan “Paxtakor” turnirning 1/8 finaliga yo‘l oldi. Klub so‘nggi turda “As Sadd”ni mag‘lub etib, turnirdagi ilk g‘alabasiga erishdi.
Jamoaning keyingi bosqichga yo‘l olishi boshqa o‘yinlar natijasiga bog‘liq edi va o‘sha bahslarda “sherlar” uchun ijobiy natijalar qayd etildi. Aniqrog‘i, muddatidan avval pley-off masalasini hal qilib bo‘lgan Saudiya grandlari oxirgi turda mag’lub bo‘lmadi va bu “Paxtakor”ning 1/8 finalga chiqishini rasman hal qildi. “An-Nassr” “Persepolis” (0:0) bilan durang o‘ynagan bo‘lsa, “Al-Ahli” esa “Al-Garafa”dan (4:2) ustun keldi.
Natijada 8 o‘yinda 7 ochko to‘plagan “Paxtakor” kuchli 8 likdan joy oldi va Elit OCHL pley-offida o‘ynaydigan ilk o‘zbek klubiga aylandi. Nimchorak finaldagi raqib — “Al Hilol” yoki “Al Ahli” bo‘ladi.
Hozirda G‘arb mintaqasida 7 yo‘llanma egasi aniq — “Al-Ahli”, “Al-Hilol”, “An-Nassr” (uchalasi — Saudiya Arabistoni), “As-Sadd”, “Ar-Rayyan” (ikkalasi — Qatar), “Al-Vasl” (BAA) va “Paxtakor” (O‘zbekiston).
So‘nggi 8-ishtirokchi Eron klubi bo‘ladi. Agar 18-fevral kuni Jaloliddin Masharipov o‘ynaydigan “Istiqlol” “Ar-Rayyan”ga yutqazmasa, keyingi bosqichga chiqadi. Agar “Istiqlol” mag‘lub bo‘lsa, Oston O‘runov harakat qiladigan “Persepolis” pley-offda o‘ynaydi.
Endi Pedru Moreyra boshqaruvidagi “sherlar” 3—4-mart kunlari jadvaldagi o‘rniga qarab “Al-Ahli” yoki “Al-Hilol”ga qarshi Toshkentda bahs olib boradi. Javob o‘yini esa 10—11-mart kunlari Saudiya Arabistonida bo‘lib o‘tadi.
1/8 finaldan o‘tgan jamoa markazlashgan final bosqichi o‘yinlarini Saudiya Arabistonida o‘tkazadi.
Izoh (0)