Ukraina tarixda birinchi marta Ozarbayjondan gaz xarid qildi. Bu haqda mamlakatning “Naftogaz” kompaniyasi rahbari Serhiy Koretskiyga asoslanib, “Vedomosti” xabar berdi.
Koretskiyning aytishicha, gaz yetkazib berish SOCAR Energy Ukraine kompaniyasi bilan tuzilgan kelishuv asosida amalga oshirilgan. Ozarbayjon gazining Ukrainaga yetkazilishi Trans—Balkan yo‘lagi orqali — Bolgariya va Ruminiya hududlaridan o‘tib amalga oshiriladi.
“Bu hajm jihatdan kichik bo‘lsa-da, strategik ahamiyatga ega ilk qadam bo‘lib, uzoq muddatli hamkorlik uchun yo‘l ochadi”, degan Koretskiy Facebook’dagi sahifasida.
Ma’lumot uchun, 2024-yil 1-yanvardan boshlab Ukraina Rossiya gazining Yevropaga tranzitini to‘xtatgan va “Gazprom” bilan shartnomani uzaytirishni rad etgandi. Bu esa mamlakat ichida gazga bo‘lgan ehtiyojni oshirib yuborgan.
Fevral oyidan beri Ukrainada gaz omborlaridagi zaxiralar minimal darajada qolmoqda, gaz esa yuqori narxlarda sotib olinmoqda. Shu sababli 27-may kuni Kiyev Gretsiya, Bolgariya, Ruminiya va Moldova orqali gaz import qilishi ma’lum qilingandi. Iyunda Ukraina energetika vaziri o‘rinbosari Mykola Kolesnik Ozarbayjonga tashrif buyurib, u yerda energetika vaziri Parviz Shaxbozov bilan uchrashgan. Ular Bokuning Ukraina energetika loyihalarida ishtirok etish masalasini muhokama qilgan.
Eng so‘nggi ma’lumotlarga ko‘ra, Ukraina yer osti gaz omborlarida taxminan 6,0–6,6 milliard kubometr gaz zaxiralagan. Bu zaxiralar umumiy sig‘imning atigi 19–19,4 foizini tashkil etadi — ushbu raqamlar so‘nggi 11 yil ichidagi eng past ko‘rsatkich hisoblanadi.
Izoh (0)