Kino, seriallar yaratish doimo murakkab va mehnat talab qiladigan jarayon hisoblanadi. Biroq ba’zida rejissyorlar jamoa oldiga shunchalik mushkul vazifalarni qo‘yadiki, hatto tajribali mutaxassislar ham beixtiyor dovdirab qoladi. Bu yil ekranlarga chiqqan shov-shuvli film va seriallarning suratga olish maydonchalarida nima bo‘lgani haqida so‘zlab beramiz.
“Substansiya” filmini suratga olishda Demi Mur vizajistni vahimaga solib qo‘yadi
Filmdagi eng dahshatli sahnalardan birini suratga olish uchun Demi Mur aktrisaning umidsizlikka tushib pardoz-andozini o‘chirish epizodini 10 yoki 11 marta takrorlashiga to‘g‘ri keladi. Rejissyorni aynan shu raqamda to‘xtashga grimchi Stefani Guilon majbur qiladi. Stefani aktrisa roliga berilib ketib, tasodifan o‘ziga zarar yetkazishidan xavotirda edi.
Guilon imkon qadar yumshoq kosmetik vositalardan foydalanishga harakat qilgan bo‘lsa-da, Demi Mur pardozini artib tashlagach, dahshatga tushadi. U rejissyorga suratga olishni zudlik bilan to‘xtatish zarurligini, aks holda aktrisaning yuzi qizarib, toshma toshishi mumkinligini aytadi.
Obraz yaratishga mas’ul bo‘lgan Per-Olivye Persen Demi Murni ba’zi sahnalar uchun 6 soatgacha grim qilishga to‘g‘ri kelganini aytadi. Film yaratuvchilari qahramonning tashqi ko‘rinishidagi o‘zgarishlar asta-sekin sodir bo‘lishi va ma’lum bir paytda uning tanasining yarmi sezilarli darajada qari ko‘rinishi kerak, degan qarorga kelishadi.
Aynan shu obraz sinchkovlik bilan va uzoq vaqt davomida yaratiladi, chunki tananing qarigan qismlari hajmliroq ko‘rinishi va ekranda sezilarli darajada ajralib turishi mumkin edi. Aktrisa grim qilinayotgan paytda qimirlamay, barcha jarayonlarga matonat bilan chidaydi.
Ariana Grande “Yovuz: G‘arb jodugari haqidagi ertak” filmida qoshlarini oqartirishga majbur bo‘ladi
Ariana Grande ijro etgan Glinda obrazini yaratishda film ijodkorlari Greys Kelli uslubidan ilhom olishgan. Ariana bu rolni shunchalik xohlardiki, hech ikkilanmay soch va qoshlarini oqartirishga rozi bo‘ladi. Shunday bo‘lsa-da, aktrisa baribir yasama soch taqishga va qoshlarini har 10 kunda qayta bo‘yashga majbur bo‘ladi. Xayriyatki, Ariananing sochlari bu muolajalardan zararlanmaydi.
Ketrin O‘Xara tasodifan “Bitljus Bitljus” filmidagi bir nechta sahnalarni buzib qo‘yadi
Justin Teru —Lidiyaning yigitini o‘ynagan aktyor u sababli ko‘plab kadrlar buzilganini tan oladi. Chunki u Ketrin O‘Xaraning qahramonini kulgili tarzda tasvirlashini ko‘rib, har safar o‘zini kulgidan to‘xtatolmagan, shuning uchun sahnani qayta-qayta suratga olishga to‘g‘ri kelardi. Biroq o‘zi ham doim Jenna Ortegani kuldirardi.
Bitljusning sobiq rafiqasi Deloresning tanasini bo‘laklarga ajratib tiklash sahnasi, albatta, kompyuter grafikasi yordamida osonroq tasvirlanishi mumkin edi, lekin Tim Byorton boshqa yo‘lni tanlaydi. Monika Belluchchi tanasining turli qismlari tiklanishini ishonarli tasvirlash uchun murakkab xoreografiyani o‘rganishiga to‘g‘ri keladi.
“Gladiator 2” kostyumlarini chamadonlarda olib kelishga to‘g‘ri keladi
Liboslar bo‘yicha dizaynerlar Janti Yeyts va Deyv Krossman film uchun taxminan 2 mingta zirh yaratishadi. Ular bilan birga ishlaydigan ustalar Yangi Zelandiya, Vengriya va Angliyadan bo‘lib, barcha kostyumlar suratga olishdan bir necha kun oldin Marokashga yetkazilishi lozim bo‘ladi.
Bu katta ish bo‘lib, Yeyts va Krossman transport bilan bog‘liq masalalarni hal qilishlari kerak edi. Krossmanning aytishicha, ilgari hech qachon yordamchilarini samolyotga zirhlar bilan to‘ldirilgan 10-12 ta chamadon bilan jo‘natishga majbur bo‘lmagan.
Ouen Tig “Maymunlar sayyorasi: Yangi qirollik” filmida suratga tushishdan oldin maxsus maktabga borgan
Aktyor Ouen Tig yosh shimpanze Noye rolini ishonarli o‘ynash uchun bir necha kun maymunlar qo‘riqxonasida bo‘ladi, keyin esa filmda ishtirok etgan boshqa aktyorlar bilan maxsus “Maymunlar maktabi”ga boradi.
Noye obrazi harakatni ushlab qolish texnologiyasi yordamida yaratilgan, ya’ni Ouen suratga olish maydonchasida shimpanze sifatida harakatlanishi kerak edi. Rekvizitorlar Tigning to‘rt oyoqda harakatlana olishi uchun qo‘l protezlarini uzaytiradilar. Bu sharoitga ko‘nikish uchun Ouen har kuni kechqurun protez taqib, uydan chiqib, to‘rt oyoqlab aylanib yurar va bu bilan qo‘shnilarni hayratga solardi.
“Furios: telba Maks solnomasi” filmidagi grim Xemsfortni g‘azabini qo‘zg‘aydi
Kris Hemsvort grim jarayoni uning uchun haqiqiy azob bo‘lganini tan oladi. Grimchilar burun yopishtirishi uchun aktyor taxminan 4 soat chidashi kerak edi. Qizig‘i shundaki, aynan shu narsa Krisga Dementus roliga yaxshiroq moslashishga yordam beradi. Hemsvort suratga olish maydoniga chiqqan paytda u shu qadar darg‘azab ediki, qaroqchilarning telba yo‘lboshchisi rolini osongina o‘ynardi.
Anya Teylor-Joy ham ko‘p vaqtini grim kursisida o‘tkazishiga to‘g‘ri keladi. Suratga olishdan oldin aktrisa sochini kalga oldirmoqchi bo‘lgan, ammo rejissyor buni taqiqlagan. Gap shundaki, uning qahramoni Furiosa obrazi film davomida tez o‘zgaradi va Anya sochlarini o‘stirishga ulgurmaydi. Shuning uchun aktrisaga sochi qirilgan parik yasaladi.
Ostin Batler “Dyuna: Ikkinchi qism” filmini suratga olish paytida qoshlarini saqlab qoladi
Tarmoqda tarqalgan mish-mishlarga qaramay, Ostin Batler Feyd-Rauta Xarkonnen roli uchun qosh va sochlarini qirdirmagan. Uning “Dyuna”dan keyingi loyihasi byudjeti cheklangan “Baykerlar” filmi edi. Shunday qilib, Batlerga nafaqat sochini, balki qoshlarini ham berkitib turadigan qoplama tayyorlashadi.
Izoh (0)