Madaniyat vazirligi “Dunyo sadolari” festivali g‘oliblarini “anjanchasiga” kiydirdi

2023-yilda Andijonda milliy va jahon estrada yulduzlari ishtirokida shov-shuvli “Dunyo sadolari” festivali o‘tkazilgani yodingizda bo‘lsa kerak. Unda ko‘plab mashhur sanʼatkorlar, xususan, xonandalar Boney M va Doktor Albandan Otawan guruhigacha chiqish qilgandi.

Festival doirasida Xonobod shahar Yoshlar markazida Madaniyat va turizm vazirligi hamda Andijon viloyati hokimligi tomonidan Yosh estrada xonandalari respublika ko‘rik-tanlovi o‘tkazilgandi. Unda 40 dan ortiq guruh va ko‘plab yakkaxon ijrochilar kuch sinashgan edi. Ana shu tanlov g‘oliblari hanuzgacha vaʼda qilingan mukofotlarni olgani yo‘q.

Qancha vaʼda qilingan edi?

G‘oliblar festivalning ochilish marosimida Madaniyat vaziri tomonidan tantanali taqdirlangan. Faxrli o‘rin g‘oliblariga diplom, statuetka va pul mukofoti (3-o‘rin — 10 million, 2-o‘rin — 20 million, 1-o‘rin — 30 million so‘m) taqdim etildi. Gran-pri sovrindori esa 40 million so‘m pul mukofoti, diplom, statuetka bilan taqdirlandi.

O‘shanda tanlovda Toshkent shahridan ishtirok etgan Bobur O‘razaliyev uchinchi o‘ringa sazovor bo‘lgan. Sanʼatkorning “Daryo”ga maʼlum qilishicha, oradan bir yarim yil o‘tgan bo‘lsa-da, berilishi lozim bo‘lgan pul mukofotidan darak yo‘q. Vazirlik hokimlikka, hokimlik esa vazirlikka to‘nkamoqda.

“Festivalda qatnashib uchinchi o‘rinni olganman. Buning uchun 10 000 000 so‘m pul mukofoti vaʼda qilingan. Afsuski, haligacha pulimizni ololmay sarson bo‘lyapmiz. Bu bo‘yicha Madaniyat vazirligi va Andijon viloyat hokimligiga bir necha marotaba, bundan tashqari, Prezident portali va prokuraturaga ham murojaat qilindi. Afsuski, hech qanday natija yo‘q.

Vazirlik masʼullari tanlov faqatgina Andijon viloyatida tashkil etilgani inobatga olinib, g‘oliblarni taqdirlash viloyat hokimligi tomonidan amalga oshirilishini bildirishdi. Hokimlikdagilar esa tanlov Madaniyat vazirligi tashabbusi bilan o‘tkazilganligini taʼkidlab, pul mukofotlarini vazirlik berishini aytib kelmoqda. Shunaqa sansalorlik bilan vaqtni o‘tkazishyapti”, — deydi Bobur O‘razaliyev.

Samarqandlik Diyora Jaʼfarova Tanlov nizomida ko‘rsatilgan mukofoti miqdori bilan g‘olib va sovrindorlarga taqdim etilgan sertifikatda ko‘rsatilgan mukofot miqdoridagi tafovutga eʼtibor qaratgan.

“Festival qatnashchilariga, yaʼni o‘rin olgan g‘oliblarga taqdirlash marosimida pul mukofoti berilishi kerak edi. Bu Nizomda ham yozilgan. Lekin, pul hech kimga berilmadi.

Eʼtibor qilsangiz, Nizomdagi mukofot pullari bilan bizga berilgan stenddagi summa ikki xil. Hujjatda 1-o‘ringa 5000 AQSH dollari beriladi deyilgan bo‘lsa-da, menga 30 mln so‘m stendi taqdim qilingan.

Bundan tashqari festival xalqaro miqyosda o‘tkaziladi, butun dunyodan qatnashchilar bo‘ladi, deb aytilgandi. Shunga qiziqib borgandik. Afsuski, faqat respublika darajasida bo‘ldi”, — samarqandlik Diyora Jaʼfarova.

Pulni advokatlar ham olib berolmayapti

2024-yilda shov-shuvlarga sabab bo‘lgan “Ovoz” musiqiy loyihasi g‘olibi Shohruxmirzo G‘aniyev ushbu tanlovda ikkinchi o‘rinni egallab, 20 million so‘mni qo‘lga kiritgan. Uning aytishicha, hammasi haqqoniy va adolatli bo‘lgan. Biroq mukofotga kelganda tarvuzi qo‘ltig‘idan tushgan.

“Murojaat qilaverib, charchadik. Hattoki chiqmagan jondan umid deb advokatlarni o‘rtaga qo‘yib ham ko‘rdik. Afsuski, hech qanday natija bo‘lmadi...

Endi oyoqqa turayotgan ijodkormiz. Shu sababli vazirlikdagilar bilan tortishib, to‘siqqa uchramaylik, deb barchasiga insof bersin deyishdan boshqa ilojimiz qolmayapti.

Ammo shu pulga ishonib, qarz olgandim, qarzga botib ketdim. Bor-ye deb voz kechib ketay desangiz, 20 million so‘m kichik pul emas.

Bundan tashqari, yaqinlarimizga, o‘sha paytda maqtanib qo‘ygan joyimiz bor. Uydagilar, hamkasblar esiga tushganda so‘rasa ana berisharkan, mana berisharkan deb aldab kelyapmiz. Shuning ortidan tuppa-tuzuk yolg‘onchiga aylanib qoldik”, Shohruxmirzo G‘aniyev.

Gran-pri sohibi Sarvinoz Kamolova ham umidlari puchga chiqqanini, masʼullarga nisbatan ishonchsizlik paydo bo‘layotganini aytmoqda.

“Bitta tanlovda qatnashish uchun qancha harakat qilamiz. Izlanamiz, yangilik yaratishga harakat qilamiz. Tanlov Toshkentda bo‘lganda ham mayli edi. Ketgan vaqtimiz va pulimizga achinmaymiz. Lekin festival Andijonda bo‘ldi.

Bir hafta oldin borib, joylashdik. Tanlovda g‘olib ham bo‘ldim. Keyin yakuniy tadbirlarda chiqishimiz kerakligini aytib, olib qolishdi. Yotog‘imiz, oziq-ovqatimizga qancha ketganini o‘zimiz bilamiz.

“Ovoz” loyihasida ishtirok etish davomida vazirga muammoni vazirga aytishga harakat qildik, lekin buning imkoni bo‘lmadi. To‘g‘rirog‘i, hal qilib beramiz, deb yana aldashdi”, — deydi Sarvinoz Kamolova.

Sanʼatkorlarni “kiydirgan” vazirlik bo‘lib chiqyapti

“Daryo” muxbiri viloyat madaniyat boshqarmasi boshlig‘i Marhaboxon Sattorova bilan bog‘langanida, u g‘oliblarga beriladigan to‘lovlarni vazirlik bo‘yniga olganini bildirgan.

“Men o‘sha paytda mezbon sifatida tashkiliy ishlar bilan asosiy sahna tomonda edim. Tanlov bilan vazirlikning Iqtidorli yoshlar bilan ishlash bo‘limi boshlig‘i Farrux Yunusov shug‘ullangan.

Hokimlik hakamlar va boshqa masʼullarning yotoqxona, oziq-ovqat xarajatlarini bo‘yniga olgan. Tanlov g‘oliblarining mukofotlarini berish vazirlikning zimmasida qolgan”, — dedi boshqarma boshlig‘i.

Viloyat hokimligi masʼullari ham tanlov vazirlik tashabbusi bilan o‘tkazilganini, hokimlikning hech qanday aloqasi yo‘qligini bildirdi.

“Tanlov xarajatlari smetada yo‘q”

“Daryo” Madaniyat vazirligi Ijodkor yoshlar bilan ishlash bo‘limi boshlig‘i Farrux Yunusov bilan ham bog‘landi.

“Festivalni xorijdan olib kelingan sanʼatkorlar bilangina o‘tkazmasdan, o‘zimizning iqtidorli yoshlarni kashf qilib, ularning tanlovda ishtirokini taʼminlab, yakunda g‘olib va sovrindorlarni rag‘batlantirish yo‘l-yo‘lakay ko‘zda tutilgan masala edi. Aslida tanlov o‘tkazish to‘g‘risida hujjat, topshiriq bo‘lmagan.

G‘oliblarga mukofot pullari berilmaydi emas, beriladi. Faqat ayni paytda byudjetimizda taqchillik yuzaga kelmoqda. Shu sababli yaqinda g‘oliblardan birini chaqirtirib, ularga hozirgi sharoitni tushuntirdik.

Agar dekabr oyining yakuniga qadar byudjet hisobraqamlari ochilib qolsa, albatta, berib yuboramiz. Qolib ketmaydi. G‘oliblarning u pullari bizga kerak emas. Shu kungacha qanaqa tanlov bo‘lsa, hammasiga mukofot pullari berilgan. Faqat shu tanlovda berilmay qoldi”, dedi Yunusov.

Uning qo‘shimcha qilishicha, shu kunga qadar unga tanlov g‘oliblari tomonidan bir marta murojaat bo‘lgan. Shundagina ularga mukofot pullari berilmayotganidan xabar topgan.

G‘oliblar esa tanlov yakunlaridan buyon vazirlikka nafaqat yozma, balki bir necha marotaba og‘zaki murojaat ham qilinganini bildirishdi. Yunusov esa bundan yaxshi xabardorligini aytishdi. Qiziq, Yunusov nimani yashirmoqchi?

“Lof bo‘lmasin bitta o‘zim kamida o‘n-o‘n besh marotaba Farrux Yunusov va uning yordamchisi Jasur Sattorov bilan shu masalada gaplashganman. Ular “bo‘ladi, bo‘ladi” deyishdan boshqasiga yaramaydi. Ammo vazir o‘rinbosari yuborgan javob xatlarida boshqa narsani gapirishadi. Doim yosh boladek aldaydi”, deydi Bobur O‘razaliyev.

Ushbu masala yuzasidan Madaniyat vazirligi axborot xizmati rahbari Sirojiddin O‘sarov bilan bog‘langanimizda yig‘ilishda ekanligini aytib, keyin o‘zi aloqaga chiqishini bildirdi. Biroq oradan bir necha kun o‘tgach matbuot kotibi safarda ekanligini va bu bo‘yicha O‘zbekistonga qaytib borganida xabarlashishini aytish bilan kifoyalandi.

“Daryo” voqealar rivojini kuzatishda davom etadi.