Nukusda 1-dekabr kuni rossiyalik jurnalist Aleksey Pivovarov, uning suratga olish guruhi va “Hook” internet nashri jurnalisti Feride Maxsetova qo‘lga olindi. Bu haqda “Hook” nashri xabar berdi.
AOKAning Qoraqalpog‘iston bo‘yicha mintaqaviy boshqarmasi mazkur holat yuzasidan izoh berdi.
“Dastlabki tekshiruv natijasida xorijiy jurnalistlar faoliyati O‘zbekiston Respublikasi Tashqi ishlar vazirligida oldindan akkreditatsiyadan o‘tmasdan amalga oshirilgani aniqlanib, bu amaldagi qonunchilikni buzish hisoblanadi. Hozirda qo‘lga olinganlar Nukus shahri ichki ishlar boshqarmasida bo‘lib, hodisa yuzasidan barcha holatlar o‘rganilmoqda”, — deyiladi agentlik maʼlumotida.
Soat 21:30 larda Aleksey Pivovarov o‘zining Telegram-kanalida vaziyat yuzasidan quyidagicha izoh berdi:
“Aytganimdek, biz hozir O‘zbekistondamiz. Nukusda bo‘lganimizda Ichki ishlar vazirligi xodimlari suhbatga taklif qilishdi. Biz gaplashdik, o‘zimiz va rejalarimiz haqida gapirib berdik, xodimlar xushmuomalik ko‘rsatib, to‘g‘ri muomala qildi. Hozir yana yo‘lga tushamiz. Hammasi yaxshi!”
Aleksey Pivovarov — mashhur televideniye jurnalisti, NTV va boshqa telekanallarda faoliyat olib borgan. So‘nggi yillarda u YouTube‘dagi “Redaksiya” kanalida bir qator postsovet mamlakatlari va boshqa xorijiy davlatlar haqida ko‘rsatuvlar tayyorlagan.
Pivovarov o‘z jamoasi bilan O‘zbekistonda ekanligi haqida noyabr oxirida maʼlum qilgan. Bir postda u paxta ip-kalavasi ishlab chiqarish jarayonini suratga olayotganini aytgan. Nukusga kelgunga qadar guruh Samarqand va Toshkentda bo‘lgan.
Xorijiy davlatlar OAVlari muxbirlarining O‘zbekiston hududidagi kasb faoliyatini tartibga soluvchi asosiy qoidalarga ko‘ra (Hukumat qarori bilan 2006-yilda tasdiqlangan), bunday faoliyatga O‘zbekiston Tashqi ishlar vazirligi huzurida akkreditatsiya asosida ruxsat beriladi.
Izoh (0)