“Daryo”ga sobiq IIB xodimi, to‘g‘rirog‘i YPXda faoliyat yuritgan fuqarodan murojaat kelib tushdi. U murojaatida ishdan nohaq bo‘shatilganini, Qashqadaryo IIB masʼullarining noqonuniy harakatlaridan norozi ekanini maʼlum qilgan.
2023-yil 7-may kuni fuqaro Rahmonqulovning murojaati asosida Qarshi shahar prokuratusi tomonidan menga nisbatan tergovga qadar tekshiruv boshlandi. Eng qizig‘i mening xatti-harakatimdan norozi bo‘lib yozilgan ariza bilan tanishtirilmadim, arizachi bilan yuzlashtirilmadim. 2023-yil 19-iyun hech qanday jinoyat alomati yo‘qligi, Rahmonqulovning murojaatiga asosan o‘tkazilgan tezkor eksperiment qidiruv tadbirida biror bir jinoyat alomatlari mavjud bo‘lmaganligi sababli JPKning 83-moddasi 2-bandiga asosan jinoyat ishi qo‘zg‘atish rad etildi. Viloyat IIB mas’ullari menga nisbatan xizmat tekshiruvini amaldagi qonun va qonunosti hujjatlariga zid ravishda 10 kunlik muddatda emas ikki oy davom ettirdi, deydi sobiq IIO xodimi, katta serjant Bunyod Xaliyev.
Sobiq IIB xodimining aytishicha, jinoyat ishi qo‘zg‘atishni rad etish haqidagi prokuratura qarori chiqqanidan so‘ng, viloyat IIB masʼullaridan biri, boshqarma boshlig‘i o‘rinbosari Z.Xo‘janov uni xizmat xonasiga chaqirib, o‘z xohishiga ko‘ra ishdan bo‘shash haqida ariza yozishini so‘ragan.
Men ariza yozmasligimni aytdim. Shunda u menga ariza yozmasam ham navbatdan tashqari attestatsiyaga qo‘yib, tizimdan yo‘qotishini bildirdi. Va xonasidan chiqarib yubordi. Oradan bir yarim oy vaqt o‘tib navbatdan tashqari attestatsiyaga qo‘yilganim uchun sinov imtihonlarini topshirdim. Barcha sinovlardan yaxshi o‘tganim uchun menga egallab turgan lavozimiga loyiq degan xulosa berildi. Shundan keyin men xizmatimni davom ettirdim, deydi sobiq YPX xodimi.
Ishdan bo‘shatilganini aytgan fuqaroning maʼlumot berishicha, 2023-yilning 28-dekabr kuni unga qo‘ng‘iroq qilgan Toshmurodova ismli fuqaro dabdurustdan bir ish yuzasidan undan 100 dollar olganini aytib, qaytarib berishini so‘ragan.
Fuqaro menga telefon qilib unga avtoavariyada avtomashinasiga yetkazilgan moddiy zararni mutaxassis bilan gaplashib yuqori narxlatib berish uchun olingan 100 dollar pulni qaytarishimni so‘radi. Men unga hech qachon bu haqda gaplashmaganimizni 2023-yil 13-noyabr kundagi sud qarorida o‘zi huquqbuzar deb topilganini eslatdim. Agar isboti bo‘lsa, viloyat IIBning oldiga kelishini, men uni kutib turishimni aytdim. U esa kelmadi. Shundan so‘ng men tungi xizmatga jalb qilindim. Kechki payt 21:00 larda menga mayor U.Mahmudov telefon qilib, tezda Qashqadaryo viloyat IIBga yetib borishim kerakligini aytdi. Borganimda hali tasdig‘ini topmagan murojaat uchun menga xuddi jinoyatchidek muomala qilishib, tushuntirish xati olish davomida oxirgi telefon muloqotimni eshittirishdi. “Pul olmagan bo‘lsang, nega chaqirasan”, deyishdi. Men ularga o‘zimning aybsizligimni boshliqlarim oldida isbotlash uchun deb javob berdim. Shundan so‘ng menga ketishim mumkinligini aytishdi. 2024-yilning 3-yanvar kuni esa viloyat IIB boshlig‘ining №1-sonli buyrug‘iga asosan Qashqadaryo viloyati Ichki ishlar boshqarmasi Qarshi shahar Ichki ishlar organlari faoliyatini muvofiqlashtirish boshqarmasi bo‘yicha jamoat xavfsizligi xizmati yo‘l harakati xavfsizligi bo‘limi muhandisi lavozimidan katta serjant unvoni bilan bo‘shatishdi, deydi u.
Bunyod Xaliyevning tushuntirish berishicha, mazkur buyruq chiqarilishiga 2024-yil 3-yanvar kunidagi xizmat tekshiruv xulosasi asos bo‘lgan ekan.
2024-yil 3-yanvar kuni viloyat IIB boshlig‘i o‘rinbosari podpolkovnik Z.Xo‘janov o‘z xonasiga chaqirtirib menga xizmat tekshiruvi o‘tkazilganini va xizmat tekshiruvi xulosasi bilan intizomiy jazo sifatida ishdan bo‘shatilganimni aytdi. Xizmat tekshiruvi xulosasini oldimga qo‘yib, tanishishimni so‘radi. Shunda men undan xizmat tekshiruvi nega mening ishtirokimsiz o‘tkazilganini so‘radim. U menga eʼtirozing bo‘lsa, oxiriga yozgin dedi. Men intizomli xodim bo‘lganim uchun uning topshirig‘ini bajarib tanishdim, lekin eʼtirozim borligini ham yozdim. Aslida mening ishdan bo‘shatilishimga Xo‘janovning o‘zi bosh-qosh bo‘ldi. U tasdig‘ini topmagan murojaat uchun fuqaro bilan nosamimiy munosabatga kirishgansan deb 17 yillik tajribamni hisobga olmay ishdan oldirdi. Qarshi shahar prokuraturasi tergovga qadar tekshiruv davomida xizmat tekshiruvida barcha vajlarni xolis va haqqoniy o‘rganib chiqib, fuqarolardan tushuntirish xatlari olgandi. Haqqoniy va xolis tekshiruv o‘tkazilgani uchun adolatli qaror qabul qilingandi. Viloyat IIB mening qaramog‘imda ikki nafar voyaga yetmagan farzandim va turmush o‘rtog‘im, nafaqadagi onam borligini, ularning taʼminoti mening zimmamda ekaniga eʼtibor qaratishmadi. Shu sabab OAV orqali chiqish qilib, menga nisbatan o‘tkazilgan noxolis xizmat tekshiruvi xulosasi bekor qilinishini shaxsan Ichki ishlar vaziri Po‘lat Bobojonovdan iltimos qilaman. Holatni nazoratga olishlarini, 17 yillik ish stajimni kuydirmasliklarini so‘rayman, deydi sobiq xodim.
Qashqadaryo viloyat IIB axborot xizmati “Daryo”ning bu haqdagi so‘roviga javob qaytarar ekan, Bunyod Xaliyevning ishdan olinishiga yetarli darajada sabab bo‘lganini, hech bir xodim sababsiz ishdan bo‘shatilmasligini maʼlum qildi. Biroq, xodimning aynan nima sababdan ishdan olinganini ochiqlay olmasliklarini qo‘shimcha qildi.
Izoh (0)