Surxondaryoda xizmat vazifasini bajarayotgan YPX xodimlarini haqorat qilib, ularni tasvirga olgan va o‘zining ijtimoiy tarmoqdagi sahifasiga joylashtirgan haydovchi ayolga chora ko‘rildi. Bu haqda Surxondaryo viloyati YHXB matbuot xizmati xabar qildi.
Haydovchi avtomashinasi yon oynalarini ruxsatnomasiz “tonirovka” qilgani uchun 2025-yilning 12-iyul kuni YPX xodimlari tomonidan chora ko‘rilgan bo‘lgan. Bundan xulosa chiqarmagan haydovchi yana shunday turdagi qoidabuzarlikni sodir etib IIO xodimining qonuniy talabini bajarmasdan voqea joyidan ketib qolgan.
Haydovchi ikki marotaba huquqbuzarlik sodir etib, so‘ngra unga maʼmuriy bayonnoma rasmiylashtirgan xodimning shaxsiy telefoniga qo‘ng‘iroq qilib uni haqorat qilgan. Shuningdek, haydovchi ayol IIB chaqirtirilganda ham xodimlarni haqorat qilib, shovqin solib javobgarlikdan qutulib qolmoqchi bo‘lgan.
Denov tumani Ichki ishlar boshqarmasi tomonidan huquqbuzarlikka oid maʼmuriy ish hujjatlari sudga taqdim etilgan. Sud hukmiga ko‘ra, sudlanuvchi Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (IIO xodimining qonuniy talabiga bo‘ysunmaslik) ikkinchi qismi bilan aybli deb topilib, 4 sutka maʼmuriy qamoq jazosi tayinlangan.
Yuqoridagi holatdan tashqari, huquqbuzar ayol muqaddam bir necha marotaba ushbu huquqbuzarlikni sodir etgani, qilmishidan o‘ziga tegishli xulosa chiqarmagani va bunday harakatini davom etib kelayotganligiga oid yana bir ish hujjatlari to‘planib, jinoyat ishlari bo‘yicha Uzun tumani sudiga taqdim etilgan. Unga ko‘ra, ayolga BHMning 20 baravari (7,5 million so‘m) miqdorida jarima jazosi berilgan.
Huquqbuzarligi uchun maʼmuriy jazo qo‘llanilganidan so‘ng 1 yil ichida takroran huquqbuzarlik sodir etgani tufayli Denov tumani IIB tergov bo‘limi tomonidan haydovchi ayolga nisbatan Jinoyat kodeksining 140-moddasi (haqorat qilish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)