Isroil “Hizbulloh” yetakchisi Hasan Nasrulloh o‘ldirilgan kuni uning qayerdaligi haqidagi ma’lumotni guruhga kiritilgan eronlik agentdan olgan. Bu haqda Fransiyaning Le Parisien nashri xabar berdi.
Ma’lum qilinishicha, hodisa kuni Nasrullohning bunkeri yaqinida o‘ldirilgan “Hizbulloh” jangchisini dafn etish marosimi bo‘lib o‘tgan. Dafn marosimidan so‘ng Nasrulloh, Eron generali va “Hizbulloh”ning 12 nafar katta qo‘mondoni bunkerda to‘plangan. Agent tomonidan ogohlantirilgan Isroil razvedkasi ularni kuzatgan. F-35 samolyotlari allaqachon hujum qilish buyrug‘ini kutib, havoda bo‘lgan.
“Hizbulloh”ning butun harbiy rahbariyati shtab-kvartiraga to‘planishini kutgandan so‘ng, Isroil samolyotlari har biri 2 tonna og‘irlikdagi oltita bomba tashlagan. Oqibatda, “Hizbulloh” bunkeri o‘rnida 30 metr chuqurlikdagi krater paydo bo‘lib, vayronalar bilan to‘lgan.
Nasrulloh ko‘rsatmalarini bajarish va yetkazish uchun mas’ul bo‘lgan odamlar portlashdan so‘ng darhol u bilan aloqani yo‘qotgan, deydi “Hizbulloh”ga yaqin manba.
The New York Times manbalariga tayanib yozishicha, 2006-yilda Ikkinchi Livan urushi tugaganidan keyin Isroil “Hizbulloh”ga chuqur kirib borgan kuchli razvedka tarmog‘ini yaratgan. Buning sharofati bilan harbiylar AQSHga ma’lumot uzatishi mumkin edi. Natijada, 2020-yil yanvar oyida Iroqda Islom inqilobi qo‘riqchilari korpusi maxsus kuchlarining sobiq qo‘mondoni Qosim Sulaymoniy o‘ldirilgan.
Izoh (0)