Тошкент вилоятининг Бўка туманида қуёш фотоэлектр станциясининг қурилиш лойиҳасига старт берилди. Бу ҳақда вилоят ҳокимлиги матбуот хизмати хабар берди.
Лойиҳа Хитойнинг China Datang компанияси томонидан амалга оширилмоқда. Очилиш маросимида корпорация бошқаруви раиси Чжоу Лей, унинг ўринбосари Ли Чжанвей ва раҳбариятнинг бошқа вакиллари иштирок этди.
Қуввати 263 мегаватт бўлган фотоэлектр станцияси “Бўка” маҳалласида жойлашади. Лойиҳа қиймати 150 миллион долларни ташкил этади.
Ушбу қуёш фотоэлектр станциясини қуриш бўйича лойиҳа 2024 йил январида имзоланганди. Президентнинг 24 майдаги қарорига кўра, қурилиш учун 621 гектар ер ажратилиши белгиланган бўлиб, у қишлоқ хўжалигига мўлжалланган ерлар тоифасидан саноат транспорт, алоқа, мудофаа ва бошқа мақсадларга мўлжалланган ер тоифасига ўтказилади.
Инвестор ишлаб чиқарилган электр энергиясини “Ўзбекистон миллий электр тармоқлари”га кафолатланган тарзда сотиш мажбуриятини олади. “Ўзбекистон миллий электр тармоқлари” 25 йил давомида ушбу электр станцияси томонидан ишлаб чиқарилган электр энергиясини сотиб олади.
Президентнинг “Ўзбекистон – 2030 стратегиясини Ёшлар ва бизнесни қўллаб-қувватлаш йилида амалга оширишга оид давлат дастури тўғрисида”ги фармонида хорижий инвесторлар иштирокида Тошкент, Қашқадарё, Бухоро, Наманган ва Навоий вилоятларида 6 та йирик қуёш электр станцияларини 2024 йил якунига қадар ишга тушириш белгиланди.
Изоҳ (0)