Андижон ва Фарғона вилоятларида истеъмолга яроқсиз алкоголь ва акциз маркасиз тамаки маҳсулотлари савдоси фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Улуғнор ва Марҳамат тумани бўлимлари томонидан ИИБ ходимлари билан ҳамкорликда ўтказилган тезкор тадбирларда “А.Г.” ҳамда “М.О.” МЧЖларга тегишли спиртли ичимликлар савдо дўконларида тегишли ҳужжатлари бўлмаган умумий баҳоси 85,3 млн сўмлик турли номдаги 1 121 дона истеъмолга яроқсиз алкоголь ва 3 152 қути тамаки маҳсулотлари савдога қўйилганлиги аниқланиб, ушбу маҳсулотлар ашёвий далил сифатида олинган.
Шу каби, Марғилон шаҳрида ўтказилган тезкор тадбирда “М.С.” МЧЖга қарашли савдо дўконида тегишли ҳужжатлари бўлмаган ҳамда қалбаки акциз маркали жами 263 дона алкоголь маҳсулотлари савдога қўйилганлиги аниқланиб, ушбу маҳсулотлар ашёвий далил сифатида олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)