O‘zbekiston Xalq-demokratik partiyasining XIV Qurultoyida saylovoldi dasturi tasdiqlandi.
Qurultoyda XDPning 2025-2029-yillarga mo‘ljallangan saylovoldi dasturi delegatlarga taqdim etildi. Bu hujjatda davlat va jamiyatni rivojlantirish, huquq va imkoniyatlar tengligini ta’minlash, kuchli ijtimoiy siyosatni olib borish bo‘yicha 10 ta yo‘nalishda qariyb 15 qadamni o‘zida mujassam etgan 100 ta taklif va tashabbuslar ko‘zda tutilgan.
Xususan, adolatli pensiya tizimini joriy etish, aholining dori vositalariga qaramligini qisqartirish, maktablarda chet tillari va axborot texnologiyalarini o‘rganish soatlarini keskin ko‘paytirish, o‘zini o‘zi band qilganlar uchun sharoitlarni yaxshilash, uy-joy qurilishida ishtirokchilarning huquqlarini kafolatlash bo‘yicha bir qator takliflar ilgari surilmoqda.
Shu bilan birga partiyaning yangi dasturida ijyimoiy himoyani rivojlantirish, Qonun ustuvorligini ta’minlash hamda davlat va jamiyat qurilishi yo‘nalishlarida bir qator muhim taklif va tashabbuslar o‘rin olganligi ma’lum qilindi.
Qurultoy delegatlari partiyaning asosiy maqsad va g‘oyalari hamda ijtimoiy himoyaga muhtoj aholi manfaatlariga oid takliflar kiritilgan Saylovoldi dasturini tasdiqladi.
Shuningdek, qurultoyda Oliy Majlis Qonunchilik palatasi deputatlarini saylash uchun bir mandatli okrugdan 75 nafar va proporsional tizim asosida 100 nafardan iborat partiyaning nomzodlar ro‘yxati taqdim etildi.
Nomzodlarning 47,4 foizi ayollardan iborat bo‘lib, barcha 175 nafar nomzod oliy ma'lumotga ega, ularning 8 foizini huquqshunoslar, 13 foizi iqtisodchi, 6 foizi muhandis, 9 foizini tibbiyot, 31,4 foizini pedagoglar, 32,6 foizini boshqa soha vakillari tashkil etadi. Shuningdek, nomzodlarning 18 nafarida fan nomzodi (PhD) va 15 nafarida fan doktori (DSc) ilmiy darajasi mavjud.
Izoh (0)