Namanganda Murodjon Ahmadaliyev boks maktabi tashkil etiladi

Namanganda Murodjon Ahmadaliyev boks maktabiga asos solinmoqda. Bu haqda “Daryo” muxbiri Azizbek Abduvaliyev xabar bermoqda.

Viloyat hokimi Shavkat Abdurazzoqov boks bo‘yicha jahon chempioni Murodjon Ahmadaliyev va masʼullar ishtirokida prezident tashabbusi bilan tashkil etilayotgan mazkur boks maktabini qurish uchun Chust tumani hududidagi imkoniyatlar bilan tanishdi.

“Bu yerda Namangan boks maktabi tajribasi keng ommalashtiriladi. Shu bois loyihada barcha sharoitlar yaratilishini eʼtiborga olamiz va kelgusida Murodjon Ahmadaliyev kabi chempionlar yetishib chiqishiga umid qilamiz”, dedi viloyat hokimi.

Boks maktabi uchun Namangan—Toshkent avtomobil yo‘lining Chust tumanidan o‘tuvchi qismidan joy tanlandi. Loyiha va qurilish ishlarini tezlatish bo‘yicha mutasaddilarga tegishli topshiriqlar berildi.