Rossiya Davlat dumasi politsiya xodimlariga xorijliklar va fuqaroligi bo‘lmagan shaxslarni deportatsiya qilish to‘g‘risida qaror qabul qilish vakolatini beruvchi qonunni maʼqulladi. Bu haqda Rossiya hukumati manbalariga tayanib, “TASS” nashri xabar berdi.
Xorijiy shaxslarni deportatsiya qilish haqida qaror qabul qilish huquqi Rossiya hududida shu paytga qadar faqat sudyalar va immigratsiya xizmati xodimlarida bo‘lgan. Endilikda esa hukumat bu vakolatni mahalliy politsiyaga berish orqali migrantlar bilan bog‘liq vaziyatni tartibga solishga urinayotgani aytilgan.
Xabarda aytilishicha, yangi tartib mamlakat politsiya xodimlariga chet elliklarni deportatsiya qilish, shuningdek, hibsga olingan shaxslar to‘g‘risidagi maʼlumotlar va hujjatlarni boshqa davlat idoralaridan va hatto chet el tashkilotlaridan so‘rash huquqini beradi. Politsiya ,shuningdek, bu borada xorijiy banklar va notijorat birlashmalaridan ham maʼlumot so‘rashi mumkin.
Endilikda Rossiyada noqonuniy ekanligi aniqlangan xorijliklar ham nazorat ostidagi shaxslar reyestriga kiritilishi belgilangan. Mamlakatdagi har bir chet ellik mahalliy politsiyaga sayohat maqsadidan qatʼiy nazar turgan joyi to‘g‘risida xabar berishi shart qilib qo‘yilgan. Politsiya “shubhali” reyestriga tushgan chet elliklarga ko‘chmas mulk sotib olish, avtomobil haydash, Rossiya hududida sayohat qilish, turmush qurish, bank hisob raqamini ochish taqiqlangan.
Davlat dumasi spikeri Vyacheslav Volodin, shuningdek, fuqarolik huquqlarini cheklovchi ko‘plab qonunlar, jumladan, ro‘yxatdan o‘tish talablari to‘g‘risidagi qonunlarning hammuallifi bo‘lgan hukmron “Yagona Rossiya” partiyasi deputati Irina Yarovaya rahbarligida Davlat dumasining Migratsiya masalalari bo‘yicha komissiyasi tuzilganini eʼlon qilgan.
Ko‘plab tahlilchilar politsiyaga deportatsiya qilish vakolati berilishi jiddiy muammolar keltirishini aytgan. So‘nggi haftalarda Rossiya viloyatlarida politsiya reydlari, migrantlarni so‘roq qilish kabi holatlar nihoyatda ko‘paygan.
Izoh (1)
Juda yomon