Kino qahramonlarining ajoyib liboslariga qoyil qolgan holda, ularning poyabzaliga deyarli e’tibor bermaymiz. Ammo ba’zida poyabzal yordamida ijodkorlar qahramon haqida biroz ko‘proq ma’lumot berishga harakat qilishadi yoki syujet davomiga ishora qilishadi.
“Jinoiy asar”
Filmning liboslar bo‘yicha dizayneri cheklangan byudjetga ega edi, shuning uchun Uma Turmanning qahramoni o‘ziga biroz kalta bo‘lgan juda kamtarona shim va ijodiy jamoa tomonidan tikilgan kofta kiygan. Ammo ayni paytda ayolning boy ekanligini ko‘rsatish kerak edi. Shuning uchun Chanel brendi tillarang balet poyabzalini taqdim etadi — bu poyabzal eksperimental namunalar orasidan topilgan.
“La-La Lend”
Dastlab filmning liboslar bo‘yicha dizayneri Sebastyanga brend tufli kiydirmoqchi bo‘lgan. Biroq mashg‘ulotlar paytida qahramonga nimadir yetishmayotgandek bo‘ladi. Shundan keyin mutaxassis raqqoslar do‘koniga borib, retro uslubidagi oq-qora poyabzalni tanlaydi.
Biroz vaqt o‘tgach, Sebastyan va Mia birgalikda raqsga tushaydigan sahnaga tayyorgarlik ko‘rayotganlarida, kostyum dizayneri “ular bir xil poyabzal kiyishi kerak”, degan qarorga keladi. Shunday qilib Mia tunda shahar fonida raqsga tushishdan oldin baland poshnali tuflisini yechib, sevgilisiniki kabi tufli kiyib oladi.
“Sen bilan uchrashguncha”
Emiliya Klark obrazi ustida ishlayotib, kostyum dizayneri uni noodatiy buyumlari kolleksiyachisiga aylantirmoqchi bo‘lgan: “Lu modani o‘rganishni orzu qilar, liboslarga qiziqishi bor edi. Ba’zi narsalar uning uchun san’at asari edi. Ayniqsa poyabzal katta rol o‘ynaydi”.
Ammo Luning g‘alati narsalarga bo‘lgan muhabbati Uillning roziligini olish istagiga zid emas. Shuning uchun u tadbirga klassik poyabzalda keladi.
“Pristsilla: Elvis va men”
Kiyim va poyabzal yordamida kino ijodkorlari Pristsillaning evolyutsiyasini ko‘rsatishadi. Elvis bilan uchrashishdan oldin qiz qulay poyabzal kiyib yurgan, lekin u xonanda bilan uchrashuvga onasining tuflisini kiyib chiqadi. Keyinchalik ham qiz sevgilisining didiga moslashib, o‘zi emas, balki boshqa birov bo‘lishga harakat qiladi. Esingizda bo‘lsa, Elvis Pristsillaning deyarli barcha kiyimlarini tasdiqlashi kerak edi — qahramon erining qo‘lidagi qo‘g‘irchoqqa aylanadi — uning shaxsiyati yorqin liboslar ortida yo‘qoladi.
Ajrashishidan biroz oldin Elvis va Pristsilla birga suratga tushishadi. Bu vaqtda er-xotinning kiyimlaridagi kontrastni sezish mumkin. Elvis yaltiroq silliq kostyum kiygan bo‘lsa, Pristsilla kamtarona bluzka, shim va to‘q rangdagi etik kiyib olgan. “U yana o‘zini topadi va tabiiy ko‘rinishiga qaytadi”, deb tushuntiradi film ijodkorlari.
“Suv shakli”
Film ijodkorlarining tushuntirishicha, Elizaga yoqqan qizil tufli hayotiy sharoitlardan bostirilgan qahramonning ichki kuchini anglatadi. Ammo ayol sevgisini topganidek, uning ruhi ham kuchayadi, shuning uchun asta-sekin u ko‘proq va ko‘proq qizil narsalarni kiyishni boshlaydi.
Eliza barcha muammolarni yengib o‘tib, o‘z kuchini dunyoga ko‘rsatib, film oxirida sevgilisi bilan uchrashganda o‘sha qizil tuflini kiyib olganini ko‘ramiz.
“Uenzdey”
Qahramon o‘ziga katta o‘lchamdagi kiyim kiyadi va bu uning tengdoshlaridan farqli ravishda hech qanday ramkaga to‘g‘ri kelmaydi degan fikrni ta’kidlaydi. Uenzdey, shuningdek, baland platformali poyabzallarni afzal ko‘radi, bu undagi soxta takabburlikni ko‘rsatadi.
Shuningdek, serialda poyabzal yovuz odamni fosh qilishga yordam beradi. Film dizaynerining aytishicha, u Kristina Richchi obrazi uchun topilgan qizil etiklarni qo‘shimcha effekt berish uchun bo‘yab chiqqan.
“Seni o‘ylab”
“Seni o‘ylab” filmida Enn Xeteuey o‘zidan ancha yosh bo‘lgan yigitni sevib qolgan 40 yoshli ayol rolini o‘ynaydi. Kostyum dizaynerining aytishicha, asosiy sahnalardan birida aktrisa o‘zini jozibador ayol kabi his qilishi juda muhim edi. Dizaynerlik libosini tanlaganidan so‘ng, Enn rolini ishonarli o‘ynashi uchun o‘ziga tegish bo‘lgan Alaïa brendining tuflisini kiyishga ruxsat so‘raydi.
Izoh (0)