Shu haftada Rossiya va Xitoy strategik bombardimonchi samolyotlari Amerika qit’asining shimoli-g‘arbiy qismida Alyaska qirg‘oqlarida paydo bo‘ldi, deya Bild xabar berdi.
Bild harbiy kuzatuvchisi Yulian Ryo‘pkening qayd etishicha, Xitoy bombardimonchi samolyotlari AQSH qirg‘oqlariga uchish uchun birinchi marta Rossiya materikidan foydalangan.
Shu tarzda ularning parvoz masofasi urush holatida AQSH va Kanadaga to‘g‘ridan to‘g‘ri tahdid qilish uchun yetarli bo‘lib chiqdi, deyiladi xabarda.
To‘rtta Ty-95 va Hian H-6 bombardimonchi samolyotlari beshta amerikalik va kanadalik qiruvchi tomonidan tutilib, havo hujumidan mudofaa identifikatsiya zonasidan chiqarib yuborilgunga qadar Alyaska qirg‘oqlaridan 300 kilometr uzoqlikda parvoz qilgan.
Bu mazkur ikki davlatning birinchi marta bu tarzda birga uchishi. Agar shunday holat yana takrorlansa, biz shay bo‘lishimizga ishonchim komil, deya ta’kidlagan AQSH mudofaa vaziri Lloyd Ostin.
Bild nashriga bergan intervyusida Xitoy bo‘yicha ekspert Yakub Yanda Pekin shu tarzda o‘z kuchlarini namoyish qilganini aytgan.
Xitoy suvosti kemalari San-Fransisko atrofida aylanganga o‘xshaydi. Xitoy AQSHning shaxsiy hududida unga tahdid qilmoqda. Xitoy mazkur harakatlari bilan go‘yoki “Mana, siz Tayvanda bizning ichki ishlarimizga aralashyapsiz, biz ham sizning vataningizga juda yaqin bo‘lishimiz mumkin”, deb aytmoqda. Xitoy o‘zining qo‘g‘irchoq ittifoqchilari – Rossiya, Shimoliy Koreya va Eron bilan diktaturalar o‘qining boshida turibdi, deydi ekspert.
Ekspertning fikricha, Xitoy Rossiyaga bazalar, harbiy samolyotlar va kemalar evaziga pul, siyosiy yordam va texnologiya taqdim etadi.
Izoh (0)