Avstraliya qirg‘oqlarida bundan 55 yil muqaddam halokatga uchrab, bedarak yo‘qolgan kema topildi. Bu haqda BBC nashri xabar berdi.
Manbada aytilishicha, Avstraliyaning quruqlik chegarasidan uncha uzoq bo‘lmagan hududda MV Noongah kemasi qoldiqlari topilgan. Ushbu kema 1969-yilda dengizdagi sunami paytida yo‘qolganicha qayta topilmagan edi.
Yuk tashuvchi kema 1969-yilda Yangi Janubiy Uels qirg‘oqlari yaqinida harakatlanayotgan paytida bo‘ronli ob-havoga duch kelgan. Tabiiy ofatning sunami bilan birga kechishi oqibatida ichiga po‘lat yuklangan og‘ir kema dengizga cho‘kib ketgan.
Kema bortida 26 kishi bo‘lgan. Ulardan besh nafari qutqarib qolingan. Keyinchalik kema kapitanining jasadi topilgan. Yana 20 nafar dengizchining jasadi esa keng ko‘lamli qidiruvlarda ham aniqlanmagan.
Halokatga uchragan kema qoldiqlarini mahalliy dengizchilar aniqlagan. Sidneydan taxminan 460 kilometr shimolda joylashgan Janubiy G‘arbiy Roks qirg‘og‘idagi okean chuqurligida nomaʼlum jismni payqagan aholi vakillari uning kema ekanligini aniqlab, hukumat idorasiga bu haqida xabar bergan.
Kema hozirda dengiz sathidan 170 metr chuqurlikda joylashgan. Uni chiqarib olish va o‘rganish uchun maxsus tadqiqot guruhi tashkil etilgan. Halokatda yo‘qolgan fuqarolarning jasadi kema ichida bo‘lishi mumkinligi taxmin qilingan.
Izoh (0)