Filippin sohillari yaqinida 25-iyul kuni 1500 tonnadan ortiq neftni olib ketayotgan ulkan tanker cho‘kib ketgan. Bu haqda BBC nashri xabar berdi.
Manbada aytilishicha, Filippin bayrog‘i ostidagi MT Terra Nova tankeri nomaʼlum sababga ko‘ra cho‘ka boshlagan. Rasmiylarning bir guruhi bunga kema ichidagi yong‘in sabab bo‘lganini aytgan bo‘lsa, yana bir guruh mutaxassislar halokatga sabab sifatida dengizda yuz berayotgan to‘fonlarni keltirgan.
Hozirga qadar tanker ichida bo‘lgan 16 nafar ekipaj aʼzosi qutqarib olingan. Bir nafar xodim bedarak yo‘qolgani xabar qilingan va uni topish uchun qutqaruv guruhi tashkil etilgan.
Tanker boshqaruvi vakili Xayme Bautista holat yuzasidan bayonot berib, tankerdan neft sizib chiqishi kuzatilganini aytgan. Dengizdagi kuchli shamol va baland to‘lqinlar esa rasmiylarning bunga qarshi javob choralari ko‘rishiga xalaqit bermoqda.
MT Terra Nova kemasi Filippinning markaziy Iloilo shahriga ketayotgan bo‘lgan. Kema cho‘ka boshlagach esa bir necha kilometr hududga neft oqib ketgan.
“U ag‘darilib, oxir-oqibat suvga cho‘kib ketdi. Kemada katta zaxira bor. U dengizga to‘kilsa jiddiy muammo bo‘ladi”, deyilgan Filippin qirg‘oq nazoratchilari xabarida.
Ko‘plab Filippin rasmiylari ko‘rfazning neft bilan ifloslanishidan xavotir bildirgan. Chunki cho‘kkan kemaning zaxirasi ulkan bo‘lib, mamlakat tarixidagi eng yirik neftdan ifloslanish hodisasiga olib kelishi hamda dengiz harakatini cheklab qo‘yishi mumkin.
2023-yil mart oyida ham Sharqiy Mindoro provinsiyasi qirg‘oqlarida 800 ming litr hajmida sanoat yonilg‘isini olib ketayotgan neft tankeri cho‘kib ketgan. Oqibatda neft yaqin atrofdagi bir nechta baliqchi qishloqlari sohillarigacha yetib borgan va qirg‘oqbo‘yini qoplab olgan. Neft qoplashi oqibatida sohil hayvonlari va qushlari qirilib ketgan, aholi boshqa hududga ko‘chirilgan.
Izoh (0)