Австралия қирғоқларида бундан 55 йил муқаддам ҳалокатга учраб, бедарак йўқолган кема топилди. Бу ҳақда BBC нашри хабар берди.
Манбада айтилишича, Австралиянинг қуруқлик чегарасидан унча узоқ бўлмаган ҳудудда МВ Ноонгаҳ кемаси қолдиқлари топилган. Ушбу кема 1969 йилда денгиздаги цунами пайтида йўқолганича қайта топилмаган эди.
Юк ташувчи кема 1969 йилда Янги Жанубий Уэлс қирғоқлари яқинида ҳаракатланаётган пайтида бўронли об-ҳавога дуч келган. Табиий офатнинг цунами билан бирга кечиши оқибатида ичига пўлат юкланган оғир кема денгизга чўкиб кетган.
Кема бортида 26 киши бўлган. Улардан беш нафари қутқариб қолинган. Кейинчалик кема капитанининг жасади топилган. Яна 20 нафар денгизчининг жасади эса кенг кўламли қидирувларда ҳам аниқланмаган.
Ҳалокатга учраган кема қолдиқларини маҳаллий денгизчилар аниқлаган. Сиднейдан тахминан 460 километр шимолда жойлашган Жанубий Ғарбий Рокс қирғоғидаги океан чуқурлигида номаълум жисмни пайқаган аҳоли вакиллари унинг кема эканлигини аниқлаб, ҳукумат идорасига бу ҳақида хабар берган.
Кема ҳозирда денгиз сатҳидан 170 метр чуқурликда жойлашган. Уни чиқариб олиш ва ўрганиш учун махсус тадқиқот гуруҳи ташкил этилган. Ҳалокатда йўқолган фуқароларнинг жасади кема ичида бўлиши мумкинлиги тахмин қилинган.
Изоҳ (0)