Italiya janubida O‘rta Yer dengizini kesib o‘tmoqchi bo‘lgan noqonuniy muhojirlarni olib ketayotgan qayiqlardan biri ag‘darilib ketishi oqibatida kamida 50 kishi halok bo‘ldi, boshqa qayiqda esa 10 nafar noqonuniy muhojirning jasadi topildi. Bu haqda Anadolu xabar berdi.
Italiyaning Rainews 24 telekanali noqonuniy muhojirlarni olib ketayotgan qayiqning mamlakat janubidagi Kalabriya mintaqasidan 100 mil uzoqlikda ag‘darilib ketganini ma’lum qilgan. Ushbu ma’lumotlarga ko‘ra, voqea joyiga yaqin yerda joylashgan yuk kemasi ekipaji yordamga kelgan va 12 kishini qutqarib, Italiya qirg‘oq qo‘riqlash xizmati guruhlariga topshirgan. Kema bortida yana kamida 50 kishi bedarak yo‘qolgan.
Baxtsiz hodisa yuz bergan hududda bedarak yo‘qolganlarni topish uchun qidiruv-qutqaruv ishlari boshlandi.
O‘rta Yer dengizining markaziy qismida noqonuniy migratsiya yo‘lida joylashgan Lampeduza oroli yaqinidagi kemada 10 nafar noqonuniy muhojirning jasadi topilgan. Kemada 61 kishi bo‘lgan, ulardan 51 nafari qutqarilgan, 10 nafarining jasadi qayiqdan chiqarib olingan.
Ular safar paytidagi chiqindi gazlardan zaharlanib, o‘lgan bo‘lishlari mumkin.
Avvalroq Turkiyaning Izmir shahri qirg‘oqlari yaqinida 37 nafar noqonuniy muhojir qutqarib qolingani, Tunis sohilidan Italiyaga jo‘nab ketgan 23 nafar noqonuniy muhojir O‘rta Yer dengizida bedarak yo‘qolgani, Turkiya dengiz zonasi nazoratchilari Egey dengizida 125 nafar muhojirni qutqarilgani to‘g‘risida xabar berilgandi.
Izoh (0)