Ummonda 15-iyul kuni mahalliy shia masjidlaridan birida qurolli hujum sodir etildi. Bu haqda mahalliy manbalarga tayanib, CNN nashri xabar berdi.
Manbada aytilishicha, hodisa Vadi al-Kabir viloyati hududida ro‘y bergan. Otishma oqibatida masjid atrofida bo‘lgan 6 nafar shaxs halok bo‘lgan.
Politsiya maʼlumotlariga ko‘ra, dushanba oqshomidagi hujumda halok bo‘lganlar orasida kamida bir nafar politsiya xodimi bo‘lgan. Turli millatga mansub yana yigirmadan ortiq kishi jarohatlangan. Jarohatlanganlar orasida 4 nafar tibbiy yordam xodimlari ham bo‘lgan.
Hujum Imom Ali masjidida sodir etilgan. Otishma shia musulmonlari uchun alohida ahamiyatga ega bo‘lgan. Muharram oyining o‘ninchi kuni, Ashuro kunida ro‘y berib, mamlakatda xavotirlarni kuchaytirgan.
Otishmalar chog‘ida uch nafar jinoyatchi aniqlangan va o‘ldirilgan. Politsiya jinoyatchilar shaxsini aniqlash bo‘yicha tergov harakatlari boshlagan.
Pokiston Tashqi ishlar vazirligi seshanba kuni Ummon rasmiylariga tayanib, halok bo‘lganlar orasida kamida to‘rt pokistonlik borligini aytgan. Vazirlikning qo‘shimcha qilishicha, yana 30 nafar pokistonlik jarohat olgan va ular hozirda shifoxonada davolanmoqda.
“Biz Ummon hukumati hujumchilarni zararsizlantirganidan juda xursandmiz”, — deyiladi Pokiston vazirligi bayonotida.
Hindistonning Ummon poytaxti Maskatdagi elchixonasi halok bo‘lganlardan bir nafari hindistonlik ekanini xabar qilgan. Jarohatlanganlar orasida Hindistondan kelganlar yo‘qligi aytilgan.
AQSHning Maskatdagi elchixonasi AQSH fuqarolari uchun xavfsizlik bo‘yicha ogohlantirish eʼlon qilib, ularga “hushyor bo‘lishni, mahalliy yangiliklarni kuzatishni va mahalliy hokimiyat ko‘rsatmalariga rioya qilishni” tavsiya qilgan.
Izoh (0)