Уммонда 15 июль куни маҳаллий шиа масжидларидан бирида қуролли ҳужум содир этилди. Бу ҳақда маҳаллий манбаларга таяниб, CNN нашри хабар берди.
Манбада айтилишича, ҳодиса Вади ал-Кабир вилояти ҳудудида рўй берган. Отишма оқибатида масжид атрофида бўлган 6 нафар шахс ҳалок бўлган.
Полиция маълумотларига кўра, душанба оқшомидаги ҳужумда ҳалок бўлганлар орасида камида бир нафар полиция ходими бўлган. Турли миллатга мансуб яна йигирмадан ортиқ киши жароҳатланган. Жароҳатланганлар орасида 4 нафар тиббий ёрдам ходимлари ҳам бўлган.
Ҳужум Имом Али масжидида содир этилган. Отишма шиа мусулмонлари учун алоҳида аҳамиятга эга бўлган. Муҳаррам ойининг ўнинчи куни, Ашуро кунида рўй бериб, мамлакатда хавотирларни кучайтирган.
Отишмалар чоғида уч нафар жиноятчи аниқланган ва ўлдирилган. Полиция жиноятчилар шахсини аниқлаш бўйича тергов ҳаракатлари бошлаган.
Покистон Ташқи ишлар вазирлиги сешанба куни Уммон расмийларига таяниб, ҳалок бўлганлар орасида камида тўрт покистонлик борлигини айтган. Вазирликнинг қўшимча қилишича, яна 30 нафар покистонлик жароҳат олган ва улар ҳозирда шифохонада даволанмоқда.
“Биз Уммон ҳукумати ҳужумчиларни зарарсизлантирганидан жуда хурсандмиз”, — дейилади Покистон вазирлиги баёнотида.
Ҳиндистоннинг Уммон пойтахти Маскатдаги элчихонаси ҳалок бўлганлардан бир нафари ҳиндистонлик эканини хабар қилган. Жароҳатланганлар орасида Ҳиндистондан келганлар йўқлиги айтилган.
АҚШнинг Маскатдаги элчихонаси АҚШ фуқаролари учун хавфсизлик бўйича огоҳлантириш эълон қилиб, уларга “ҳушёр бўлишни, маҳаллий янгиликларни кузатишни ва маҳаллий ҳокимият кўрсатмаларига риоя қилишни” тавсия қилган.
Изоҳ (0)